Press "Enter" to skip to content

Aïu phi la leh ïa kiba tih dewïong beaiñ bad ïa ki ophisar ba ailad, ong ka SC

New Delhi: Ka Supreme Court jong ka ri India, ka la buh jingkylli ïa ka sorkar Meghalaya, kaei kaba ka la leh ïa kito ki briew ba tih dewïong beaiñ bad ïa ki ophisar kiba ailad ïa kane ka kam beaiñ.
Ka ïingbishar ba ka khlieh da u Nongbishar AK Sikri, haba la bteng biang ïa ka jingbishar halor ka jingshah tep im ki 15 ngut ki nongtih dewïong ha Ksan, East Jaiñtia Hills, ka la bthah ruh ïa ka sorkar ban dang ïai bteng ïa ka jingwad ïa kine kiba shah tep sha krem dewïong naduh ka 13 tarik u bnai baladep. “ïai bteng ïa ka jingwad, ei ban tip lah ban don kiba dang im, namar ki kambah ki ju jia”, la ong u Nongbishar Sikri.
Ka ïingbishar ka la bthah ruh ïa sorkar pdeng bad sorkar jylla ban wad shuh ki jingïarap na kiwei pat ki kynhun ba kham tbit ha kaba ïadei bad kane ka jingïakhun ban sei ïa ki nongtih dewïong kiba sahkut ha ka krem kaba jrong kumba 370 phut shapoh khyndew.
Haduh mynta kumba 28 lak litar ka um la tan na kane ka krem, hynrei kam shym la don ka jingduna ha ka um ban long ban ngam ki briew. Ka sorkar ka la ong ba kane ka krem ka don ha ka jaka kaba eh bad kam long kaba suk ban pynpoi ïa ki kor ki bor.
Ka um ka la ïoh rung sha kane ka krem na ka wah kaba don marjan bad ka krem bad ka don ka jingïasnoh ruh bad kumba 20 tylli kiwei pat ki krem dewïong.
Ka sorkar ka la ïathuh ruh ha ka ïingbishar ba ki don haduh 20 ngut ki briew kiba don bynta ha kane ka jingwad ïa kine ki 15 ngut. Kine ki kynthup ruh ïa ki shipai duriaw, ki NDRF, ki SDRF, ki Pulit ngam um bad kiwei kiwei de ki bor.