Press "Enter" to skip to content

Jop ka YBSC Shella ïa ka Tyrsad Combine XI ha ka VMIFT 2018-19

Mawkyrwat, K’lyngkot 11: Ka YBSC Shella pyrshah ïa ka Tyrsad Combine XI da 1 – 0 kol ha ka jingïalehkai Pre Quarter final kaba hynriew jong ka V Mawten Invitational Football Tournament 2018-19 kaba ka long mynnin ka sngi ha madan mawpyllun Mini Stadium, Mawten.
Haba phai ha ka jingïalehkai ha ka kyllastep ka long ka jingïalehkai kaba ïa khaid bha ha kaba baroh ar tylli ki kynhun ki long kiba ïa biang bor.
Hapdeng jong ka jingïalehkai, ka Tyrsad Combine XI ka don ki ‘rangïalehkai dien kiba tbit kiba lah ban khanglad ïa kiba bun ki jingpahad bol bad ïa ki kabu ksiar kiba itynnad jong ka YBSC Shella. Shuh shuh ka Tyrsad Combine XI ka la ïoh ar tylli ki kabu ksiar ban pynkhih ïa ka jar, hynrei ka jingbym lah ban leh bha da ki strikers ka la shu long leh noh ei noh ha kaba ka jingïalehkai jong ka kyllastep ka la shukut khlem da lah ban ïa pynkhih jar.
Haba wan biang ha ka jingïalehkai jong ka kyllamiet, ka jingïalehkai ka la nang kham itynnad ha kaba baroh ki nongkyrshan jong ki kynhun ki la sdang ban ïa risa ïa kynhoi bad ap khmih lynti ïa ka jingpynkhih jar jong ki ar liang. Ka Tyrsad Combine XI ka la ïoh biang ki kabu ksiar kiba biang ban pynrung sha kol hynrei ka jingtbit jong u nongap kol ka YBSC Shella ban kyrda ïa ki bol ka pynlong ïa ka jingkhun ban shu kut noh tang ha ki jingïapyrshang. Dei ha ka minit kaba 74 ba u Bryan Shadap ula ïoh knieh ïa ka bol hadien ka jingïabakla ban pashad da ki ’rangapdien jong ka Tyrsad Combine XI bad jlang u la pynrung ïa ka bol shapoh kol khlem da lah ban leh ei ei shuh da u Goalkeeper jong ka Tyrsad bad dei lyngba kane ka shi kol ka YBSC Shella ka la ïoh ban rung sha ka quarter final.
Ïa ka khusnam Man of the Match ha kane ka sngi la ïoh pdiang da u Bryan Shadap jong ka YBSC Shella uba la ïoh thep ïa kol ban pynjop bad ïa kane ka khusnam Man of the Match la sam da i E. Kongthiang i J.E iba trei ha PHE Mawkyrwat bad iba long ruh iwei na ki riew rangbah ba ieid ïa ki jingïalehkai hapoh jong ka Dong ka thaiñ.