Press "Enter" to skip to content

Kyrshan ki nongshong shnong ban pynheh ïa ka Shillong Airport ha Umroi

Shillong, K’lyngkot, 11: Ki nongshong shnong jong ki shnong bapher bapher ka thaiñ Umroi ki la ai jingkyrshan ïa ka jingthmu ban pynheh ïa ka jaka hiar liengsuiñ hapoh ka Kad Liengsuiñ kaba don ha Umroi ba la thmu ban pyntrei da ka Airport Authority of India (AAI).
Kane ka sur ai jingkyrshan na ki paidbah ha ka mih ha ka sngi pynsngew paidbah (Public Hearing) kaba la long ha Umroi mynta ka sngi ha ka 9 tarik mynta u bnai.
Ki nongshong kiba la kren ha kane ka sngi ki la pynpaw ba kim don kano kano jingpyrshah ïa kane ka projek hynrei ki kwah ba ki tnad Sorkar ba kin khmih ïa ki jingdonkam jong ki nongshong shnong kiba sah ha ki shnong kiba don mar syndah bad kane ka Kad Liengsuiñ la ka long ha ka jingpynheh ïa ka surok, ka aikam aijam, ka Hospital bad kiwei kiwei ki jingdonkam jong ki paidbah.
U Bah Aison Khyriem uwei na ki nongshong shnong jong ka shnong Umden Arka haba kren ha kane ka sngi, u la ong, “ngam don kano kano ruh ka jingpyrshah ïa ka jingpynheh ïa ka Kad Liengsuiñ. Hynrei nga buh tang ka jingkyrpad ïa ka tnad Sorkar ban thaw ïa ka surok khnang ba ki paidbah kiba sah hajan kane ka Kad liengsuiñ ki lah ban ïaid lyngba.”
Na ka liang u Bah Hamles Mylliem Umlong, u nongshong shnong ka Syllei-U-Sar, u la ai jingmut ïa ka Airport Authority of India ba kam dei ban pynjulor ïa ki jaka rep ha ka por ba tih ïa ka khyndew na ka bynta ban pyneh ïa ka jaka hiar ki liengsuiñ.
U Rangbah Shnong ka shnong Umden, u Bah Pailang Kurbah u la pynpaw ba ka Sorkar ka dei ban pyndam noh halor ka jingdonkam No Objection Certificate (NoC) na ka bynta ban tei ïa ki iing da ki paidbah ha ki shnong kiba mar syndah ka Liegnsuiñ.
U nongshong ka Umden Mission, u Bah Basil Lyngdoh u la kyntu ïa ki bor ba dei peit ban pyrshang ban thaw kam thaw jam ïa ki samla ka thaiñ. U la kyntu ruh ba ka Sorkar ka dei ban wanrah ïa ki projek na ka bynta ban kyntiew ïa ka roi ka par jong ki shnong kiba mar syndah ka Kad Liengsuiñ.
U Environmental Engineer ka Meghalaya State Pollution Control Board (MSPCB), u Bah W.R. Kharkrang haba kren ha kane ka jingïalang, u la pynpaw ba ka jingthmu jong kane ka jingïalang kan long ba ïoh ïa ka jingsngew bad ïa ki jingai jingmut na ki paidbah kiba shong ba sah ha ki shnong kiba marsyndah bad kane ka Kad Liengsuiñ shwa ban shna pynheh ïa ka jaka hiar khyndew ki liengsuiñ hapoh kane ka Kad Liengsuiñ kaba don ha Umroi. U da kyntu ruh ïa ki paidbah ba kim dei ban shim ïa kane ka jingïalang kum ka lad ban ïatai.
Ïa kane ka jingïalng la pynïaid bad sngap ïa ka sur u paidbah da ka Additional Deputy Commissioner, Ri-Bhoi District , ka Kong D. Phawa.