Press "Enter" to skip to content

Mih ki longkmie Congress ha Shillong, ki samla ha Tura ban pyrshah ïa ka CAB

Mynsaw 4 ngut ha ka jingïakhih ha Manipur

Shillong/Tura/Imphal: Shi kynhun ki longkmie jong ka Mahila Congress, ki la mih hakhmat ka Congress Bhavan ban pynpaw ka jingpyrshah ïa ka Citizenship Amendment Bill, kaba la mynjur da ka Lok Sabha ha ka 8 tarik mynta u bnai.
Kine ki longkmie ki la pynpaw bad a lei lei kim lah ban pdiang ïa kane ka Bill jong ka sorkar u Modi, kaba wanrah ka jingma ïa ki jaidbynriew rit paid jong ka jylla. “Kumba ki nongïalam jong ka Party, ki la ïeng pyrshah wat haduh ha Lok Sabha, ngi ruh ngi mih ban pyrshah ïa kane ka Bill ban ïada ïa ka jylla”, ki la ong.
Ha kajuh ka por, ki samla jong ka Seng, ki la mih paidbah bad tur sha ka ophis jong ka BJP kaba don Tura bad ki la thang ryngkat ka pyrta shla artad ïa ka dur jong u Myntri Rangbah duh ka ri, u Narendra Modi.
Ka Meghalaya Pradesh Youth Congress, kaba la lam khmat ïa kane ka jingïakhih ka la tur sha ka ophis jong ka BJP ban pyndem jur ïa ka sorkar pdeng kaba la wanrah ïa kane ka Bill, wat hapdeng ka jingïeng pyrshah ki jylla jong ka thaiñ shatei lammihngi.
Ha ka jingïeng pyrshah kaba kham khlaiñ, kawei na ki sorkar ba ïalam da ka BJP ha ka thaiñ shatei lammihngi, ka sorkar Manipur, ka la kyntu ïa ka sorkar pdeng ban pyllait ïa ka Manipur na ka jingpyntreikam ïa kane ka Bill ka ban shah ïa ki jaidbynriew bym dei na ka niam Muslim na Bangladesh, Pakistan bad Afghanistan ban wan shong ha India, lada ki mad ïa ka jingshah pynshitom beiñ.
Hynrei ha kane kajuh ka sngi, saw ngut ki samla pule ki la mynsaw ha ka jingïakulmar bad ki Pulit, ha ka jingïakhih pyrshah ïa ka CAB, ba la pynlong da ki seng samla pule bapher bapher jong ka jylla.