Press "Enter" to skip to content

Phai khmat ka India na ka bynta ka jingïakhun ka ban wan pyrshah ïa ka Bahrain

Abu Dhabi, K’Lyngkot 11: Wat lada ka kynhun ïalehkai ka India ka la shah rem noh da 0-2 hakhmat ka UAE, ha ka jingïakhun kaba ar, ka Gr-A ka lympung ïalehkai jong ka AFC Asian Cup ba la long hynnin ka janmiet sngi Palei ha nongbah Abu Dhabi, pynban u paidbah ba ieit bad ba sngewtynnad ïa ka phutbol, um lah ban mutdur ban shem bad ïohi ba ha madan, ki rang ïalehkai ka India, ki la lah ban kyntiew hi joit ïa ka rukom ïalehkai ka jong ki.
Dei hadien ba la shem bad ïohi, ïa kane ka sur ïalehkai jong ka kynhun ïalehkai ka ri, u paidbah nongkyrshan ka ri, u kyrmen ba lada ki pleïar, ki la ban bteng ïa kane ka sur ïalehkai kumba ki la pynpaw hynnin ka janmiet, khlem pep ka janmiet lah sngi U Blei ka taiew kaban wan, ka kynhun lada don lang sa ka bok ka nusip, khlem pep ka lah beit ba kan jop ïa ka Bahrain ban buh jaka pat ïalade sha ka kylla ïalehkai kaba ar ne pre quater jong kane ka jing-ïakhun.
Ïa kane ka juh ka rukom pyrkhat ka la rung lem ruh ha u coach ba rangbah ka ri u Stephen Constantine bad kyntu ïa la ki jong ki rang ïalehkai, ba ka por ka la donkam bha ïa ki ban tylli kawei ban pynkhreh naka bynta ka jingïakhun kaban wan pyrshah ïa ka Bahrain.
“Ngi donkam tylli mlon kawei kum ka kynhun bad long kiba pynkhreh naka bynta ka jingïakhun kaban wan, ha kaba donkam ban buh ïa ka thong bad ban dei ruh ban lah ban pynurlong shi syndon ïa ka bad kyrmen ba ngin ïoh eiei na kane ka jingïakhun khnang ba ngin lah ban jam shakhmat ha kane ka lympung” la pynpaw u Constantine.
Ïa kane ka sur la pynpaw lang ruh na u kapten ka kynhun ïalehkai ka ri u Sunil Chhetri.
“Ngi dang biang pura bha kum ka kynhun, ngi long ruh kiba la khreh ban ïakhun pyrshah sa ïa ka Bahrain bad ban ïakhun tyngeh haduh kaba kut” la pynpaw u Chhetri.
Haba phai dien sha ka jingïakhun pyrshah ba hynnin ka miet pyrshah ïa ka UAE, u Chhetri u sngew ban ong ba lada dei ba la ïoh ban thep ïa ki kol na ki kabu ksiar ba la wan ban mih paw, ka resol na kane ka jingïakhun kan jin da kylla long da kumwei.
U Constantine ruh u la pynsngew ïa la ki nong-ïalehkai, ba kim shym la rem, hynrei u la pyrto pat ïa ki, namar ba ki la pynpaw madan ïa kata ka mynsiem ban ïakhun, kaba la pynkyndit hi thret wat ïa ka kynhun ïalehkai jong ka UAE ha kaba kim lah ban mutdur ba ki la hap ban ïakhun pyr-shah ïa ka India kaba ka rukom ïalehkai ka jong ka, ka la kiew bha shakhmat.
U Constantine u sngew ba lada ïoh lei lei ïa ka lad ban bteng ban ïakhun pyrshah ïa ki ri kiba kham khlaiñ, kan ïarap shuh shuh ban tei ïa ka nongrim ïalehkai kaba skhem ïa ka kynhun hi baroh kawei.
Ha kane ka kynti hiar ïakhun kaba mynta sha kane ka lympung, kiba bun na ki rang ïalehkai jong ka India ka rta ka jong ki, ki long kiba hapoh ka 25 snem ka rta, kaba kren shai kdar ba ka lawei ba phyrnai ïa ka ri ha ka liang ka phutbol ka don ïa ka jingkyrmen kaba skhem ba kan kiew ha ki sngi bad snem kiban wan.