Press "Enter" to skip to content

Rai ka NGT Committee ban hiar tohkit sha Ri-lum Garo ïa ka jingtih dewiong be-aiñ

Shillong, K’lyngkot 11: Ka Committee ba laitluid bala thung daka National Green Tribunal (NGT) kala rai ban hiar tohkit haduh ar- sngi kynthih sha Ri-lum Garo ban lap la ka don ne em ka jingtih dewiong be-aiñ wat hapdeng ka hukum jong ka Tribunal.
Ïa kane la pyntip da u Justice (Retd) BP Katakey uba khlieh ïa ka Committee hadien ka jingpynlong ïa ka jingïalang ba hynniew hynne ka sngi thohdieng ha Nongbah Shillong.
La ïashimbynta ha kane ka jingïalang da ki Ophisar na ka Tnad Central bad State Pollution Control Board, Tnad Kam Pohïing, Mining & Geology, Tnad ka Koit ka Khiah, ka NESAC bad kiwei kiwei.
Hadien ka jingïalang, u Katakey ula ïathuh ha ki lad pathai khubor ba ka Committee kan hiar tohkit sha Ri-lum Garo khamtam ha South Garo Hills District, kaba la mih ka jingjia khyllem par ha Nangalbibra myn ha ka 30 bad 31 tarik bala lah.
“Ki don ki jingtih dewiong ha ka thaiñ bad ngi kwah ban ïohi la ka jingtih dewiong ka dang bteng ne em wat hapdeng ka hukum jong ka NGT” ula ong haba pyntip ba ka Committee kan sa buh tarik na ka bynta ka jingïalang ba bud, ka ban long ha ki pdeng taiew jong u bnai Rymphang. Lah ban kdew ba ka Committee kala hiar tohkit ïa ki par dewiong ha East Jaiñtia Hills myn ha ka 12 tarik Naiwieng jong u snem bala lah.
U Katakey u pyntip ba ka Committee kala bthah ïa ki bor sorkar ba kin pyntip lang haba ïadei bad ki jingtohkit ba kila pynlong halor ki 1200 tylli ki case bala register pyrshah ïa ka jingshalan be-aiñ ïa u dewiong. U ïathuh ba haduh 98 tylli ki case la register hapoh East Jaiñtia Hills kiba ïadei bad ka jingtih dewiong hadien ka hukum jong ka NGT haba bynrap, hynrei haduh mynta ka Committee kam pat ïoh pdiang satia ïa ki kaiphod jong ki jingtohkit ïa kine ki case.
“Ngi la hukum ïa u SP ka East Jaiñtia Hills District ba un aiti ïa ka kaiphod ha ka sien shong jingïalang ban wan namar ka jingtohkit ka dei ban poi sha kaba kut” ong u Katakey uba ïathuh baka Committee ka dei kaba la thung ban tohkit ïa ka jingtih dew iong be-aiñ bad ka jingjot jingjulor jong ka mariang.
U Katakey u ong, ba de halor ka hukum ba khatduh jong ka NGT ba mih myn ha ka 4 tarik Kyllalyngkot, ka Committee kala hukum ïa ka Sorkar Jylla ba kin aiti ïa ki skhim na ka bynta ban aikam aijam noh da kiwei ïa ki nongtih par dewiong. Ha kane ka jingïalang, ka Committee kala shim jingthoh ruh ïa ka jingïaid jong ka jingwad ïa ki 15 ngut ki nongtih par kiba shah tep im ha ka par dewiong ha Khloo Ryngksan, kaba jia myn ha ka 13 tarik Nohprah nalor ka jinglap ïa ki artylli ki metïap dang shen.
“Kila dep aiti ïa ka kaiphod halor ka jinglong jingman jong ka jingiawad ïa ki nongtih par ba shah tep um bad ngim don eiei shuh ban ong lait na kane namar kane kan sa ïaid ha ka jingbishar jong ka Ïingkashari Supreme Court” ong u Katakey.
Ha ka jingïalang ba khatduh, ka Committee kala pynpaw ïa ka jingsngewkhia halor ka jingbym lah jong ka Sorkar Jylla ban ai ïa ki jingtip halor ka jingdon jong ki briew kiba ïap ne ba mynsaw na ka kam tih dewiong hapoh ka Jylla. Haba kylli, u Katakey ula ong ba ka Committee kala hukum ïa ki Deputy Commissioner jong baroh ki District ba kin ai jingkheiñ ïa ka jingïap bad jingmynsaw jong ki nongtih par dewiong lada ki don.
“Namar kila pyntip ba kim don jingkheiñ satia ngi la hukum ïa u Additional Chief Secretary ba un pynmih noh da ka Public Notice ha ki kot khubor bad kila pyndep ruh ïa kane” ula ong haba pyntip ba kane ka Public Notice ka long ban khot shakhmat ïa ki nongtrei par dewiong ba kin wan kam lada kila mynsaw teng lane don napdeng ki bahaïing hasem jong ki, kiba la ïap na ka kam tih dewiong.