Press "Enter" to skip to content

Sa katno ngin dang dusmon ia ki Dohum?

U briew u ïai don beit ka mynsiem ban da leh ïa kano kano ka kam, u da kwah beit ban da pynjot, ban khlem da pyrkhat shuh ïa kiwei, ne ïa ka jingmyntoi naka bynta kiwei. Ka jingpynïap beiñ ïa ki doh-wah, ka dei kawei na ki nuksa haba kwah te kwah eh ban bam, pynban ka mynsiem kam hun ban bam noh tang ne khwai iwei ne ar, pynban da ban da dusmon tad haduh ba kiwei ruh kim lah shuh pat ban ïoh ban bam ïa ki.
Ki doh um ki doh wah, lah ban ong ba kidei kiba jyllei bha ha kiba bun ki wah bah ne ki wah rit jong ka jylla, ha kaba ka jingdon ka jong ki, ka khring bha ïa kiba bun ki rawon, kiba man ba ïoh ka por, ki her sha ki wah, ban shong ban khwai baroh shi sngi.
Ha ka jingim u rawon ne u nongkhwai, ym don eiei kaba hun tam ha ka mynsiem lada ïoh ïa I dohkha I ba tang shi tda, pynban jah thait jah jrem ka met ba shong bad shah ïa ka shit ka thang ka sngi, ba shon ba bom u slap u phria, hynrei haba rung ha la ïing,da kwah shisha ban pynheh ïa ka khana, ba katno tam ki dohka kiba heh hynrei kiba la lait noh. Hynrei lada jia pat ba brut ne bym ïoh kata ka nang pynskuiñ shuh pat ïa ka mynsiem ïa u rawon ba tang ïoh por un hiar biang sha wah naka bynta ban ïoh pat ban pynhun ïala ka jong ka mynsiem ïa kaei kaba la dep ban jia.
Ka jingim u nongkhwai haba la kyrni lei lei ïaka, da shisha ka long pat kaba itynnad, namar ka jingim jong kine ki briew, dei kaba ki im ryngkat ryngkat bad ka mariang, namar haba ki leit man la ka por, ka mariang ka ai shibun bah ka jingnang ka jingtip ïa ki, kum haba wan kiew kynsan ka um, ki tip ba don ka jingjur bha u slap na sha kiwei pat ki jaka, da kumta ki tip ruh da kumno ba kin nang ban kiar noh pat ïalade ban lait na ka jingma, nalor kata ka jingim ki nongkhwai ka wanrah ruh ïa ka met kaba koit kaba khïoh, namar haba leit sha ki wah, ka ja ruh da bang bha, ka jingmut ka jingpyrkhat ka jong ki ka lait shi por na ka jingbun palat ka kam kaba ki trei ki ktah man la ka sngi.
Pynban ha ka mynsiem u riew dusmon kaba ïalade ruh ym lah shuh ban bam, ïa kiwei pat ruh ym ailad ber lih da bih, kaba pynïap beiñ pat ïa ki dohum, kiba lada ailad ïaki ba kin im beit ha ki wah, lehse kin da lah ha kaban nang pynkha roi ïa kiba bun ki dohkha bad ba ki um ki wah kin dap kyrhai da ki har rukom ki dohum, kiba khring pat ïa ka mynsiem ba brai jong ki rawon.
Ban tehlakam ïa kum kane ka kam dusom ka long kaba eh, namar ba u briew hi na lade shwa u donkam ba un sngewthuh ïa ka jingkordor ka jingdon ki dohum ha ki wah. Ka nuksa kat kum ba la mih ha ka kot khubor ïa ka jingjia ha ka Wah Umtung ha Ri-Bhoi, haba khmih bad ïa ki dur, da I bynnud bad I pangmet haba shem bad ïohi ïa ka jingïap ei ki dohkha ha ki rud wah,. Kaba ha ka jingshisha, lada dei baym leh dusmon, lehse kiba bun ki rawon ne ki nongtong ïa ki dohkha, kin jin da la ïoh ban dait ne ban tong ïa ki ban ïoh ban bam pat ha la ïing ha la sem.
Kumta, kaei kaba donkam ka long kum ki para briew donkam ban ïa pynsngewthuh mar kylliang, ha kaba donkam ruh ban ïa syllok lem para briew da kumno ban nym rung palat ka mynsiem ban shu leh kput ne ban shu dusmon. Nalor kata ka por ruh ka la donkam ïa ki bor shnong, ba kin shim khia noh shi syndon halade, ban thaw ïa ki aiñ ki kanun shnong ban lah ha kaban khanglad ïa ki riew dusmon ba kin nym mlien shuh hsa kaban ïap beiñ ïa ki dohum.
Ki aiñ ne kanun ka long ba lada lap ha ka sien ba nyngkong donkam ban da shaiñ da ka kuna pisa kaba heh, hynrei lada ki dang ïai bteng ne lap ba ki leh biang ïa ka juh ka kam, donkam ban aiti beit ïa ki sha ki bor jong ka aiñ, khnang ba kin ngat ha ka jingshah pynshitom kiba kham jwat.
Naka liang ka sorkar, wat lada kam lah than eh ba kan shna ïa ki aiñ kiba tyngeh, pynban ka donkam ba kan thaw ïa ki lad ki lynti ban lah ha kaban khreh ban shimti shipor halade naka bynta ban iada ïa ki dohum ba don ha kiba bun ki wah ha kane ka jylla, da kaba shimti shipor halade, ka sorkar ka lah ha kaban theh shuh shuh ki bun jait ki symbai dohkha, khnang ban lah ha kaban nang pynkha roi shuh shuh ïa ka jingdon ki dohum ha ki um ki wah.
Hynrei ka kam ban ber dawai bih ïa ki dohkha ha ki um ki wah ka la donkam ban sangeh noh shi syndon bad ha ka juh ka por donkam shisha ban shim khia naka bynta ban phriang pat ïa ka khubor ka jingdonkam ban pynneh bad ban pynsah ïa ki dohum, namar ka jingdon ka jong ki ym tang ba ka khring ïa ki rawon hynrei ka iarap ruh ha kaban pynkhuid ïa ki um ki wah, namar ba ki dohum haba ki im ha ki wah, ki jingbam ba ki bam baroh kidei kiba iarap ban nang pynkhuid ïa ki jaboh jong ka um, kaba u briew u lah lang ha kaban pyndonkam pat ïaka.