Press "Enter" to skip to content

Thang ki lai seng ïa ki tyngshop CAB, Modi, Amit Shah bad Rajnath Singh

Ha ka taiew ban wan yn ïakynduh ka NEIPF ha Guwahati
Shillong, K’lyngkot, 11: Ki lai tylli ki Sengbhalang bapawkhmat ka Jylla Meghalaya kiba kynthup ïa ka Federation of Khasi Jaiñtia and Garo People (FKJGP), Hynñiewtrep National Youth Front (HNYF) bad ka Ri-Bhoi Youth Front (RBYF) mynta ka sngi thohdieng ki la pynlong da ka jingrah lama iong ban pyrshah ïa ka Citizenship (Amendment) Bill, 2016 ïa kaba la mynjur ban pynlong aiñ dang shen da ka Iingdorbar Thawaiñ Lok Sabha.
Kine ki lai seng kiba la ïalum lang ha Khyndai Lad, nalor kaba pyrta ruh ïa ki sur pynrem ki la thang duh da ka ding ïa ki dur tyngshop jong ka Sorkar National Democratic Alliance (NDA) ba la ïalam da ka Bharatiya Janata Party (BJP), ïa ka dur tyngshop jong u Myntri Rangbahduh ka ri u Narendra Modi uba shu leh ‘donbor’ ban mynjur ïa kane ka Bill khlem da pynsngap satia ïa ka jingmong jong ki paid riewlum ritpaid ka Jylla Meghalaya bad kiwei kiwei ki Jylla ka thaiñ Shatei Lammihngi ka ri India bad kynthup ruh ïa ka dur tyngshop jong u Myntri ka tnat Kam Pohing ka Sorkar India, u Rajnath Singh bad ïa ka dur tyngshop jong u National President ka BJP u Amit Shah.
U General Secretary ka Hynniewtrep National Youth Front (HNYF), u Bah Sadon K. Blah, haba kren ha kane ka sngi u la ong ba ka Sorkar India sa shisien ka la shet kylla ïa ki paidbah jong ka thaiñ Shatei Lammihngi. “Ka sien ba nyngkong ba ki la shukor ka dei haba la phiah ïa ka Ri India ha u snem 1947 bad mynta ki la shukor biang da kaba wanrah ïa ka Citizenship (Amendment) Bill, 2016,” u la ong.
“Ki kynhun sengbhalang bapher bapher na kane ka thaiñ ki la pynpaw ïa ka jingpyrshah kaba jur hakhmat ki dkhot ka Joint Parliamentary Committee (JPC) halor ka jingtyrwa ban pynlong aiñ ïa kane ka Bill. Hynrei kaba sngewsih, ka Sorkar NDA ba la ïalam da ka BJP ka la ïaid beit shakhmat ban mynjur ïa kane ka Bill ha ka Iingdorbar Thawaiñ Lok Sabha wat hapdeng ka jingpyrshah kaba jur bha na ki paidbah jong kane ka thaiñ,” la ong u Bah Sadon.
“Kane ka pynpaw shai ba ka BJP kam don jingsngew eiei wat tang khyndiat ruh ïa ka lawei jong ki paidbah kane ka thaiñ,” u la ong bad bynrap, “hynrei ki leh tang ban pyrkhat ïa ka jingmyntoi saiñpyrthei shimet jong ki.”
Haba buh jingkylli ïa ka Sorkar ND, une General Secretary ka HNYF u la ong, “hato ka Sorkar ka pdiang sngewbha ïa baroh ki 16 million ngut ki Hindu na ka ri Bangladesh ban ïoh ïa ka syrnot long nongshong shnong ka ri India?”
“Nga kwah ban buh jingkylli ïa ka BJP, hato ki la pyrkhat bha neem kaei ka ban jia ïa ki paidbah ka thaiñ Shatei Lammihngi lada baroh 16 million ngut ki Hindu na Bangladesh ki wan sha India. Ngim dei ban klet ba ka thaiñ Shatei Lammihngi ka don markhap bad ka ri Bangladesh,” u la ong.
Ha kawei pat ka liang, u President ka FKJGP, u Bah Welbirth Rani haba pynrem ïa ka Sorkar NDA ba la ïalam da ka BJP u la ong, “kane ka Bill ka dei ka jingtim kaba khraw ïa ki jaidbynriew ritpaid jong kane ka thaiñ.”
Haba kynthoh ïa ka jingsynreit kuli ki Pulit ïa ki san ngut ki samla riewlum Tripuri , u la ong, “ki paidbah ha ka Jylla Tripura kim shym la nud shuh ban dang ïashim bynta ha kino kino ki jingïakhih pyrshah kane ka Bill hadine katei ka jingjia. Hato ngi ruh ngi kwah ban wan jia kum kine ki jingjia hapoh kane ka Jylla Meghalaya ha kaba ki trai ri trai muluk kin nud shuh wat tang ban kren ïa ki ishu kiba ktah ïa ka hok jong ki.”
U la ong ruh ba kan ym poi shaei shaei ruh lada ki paidbah ki shah buh kyndon ban pyrshah ïa kane ka Bill.
U Bah Welbirth u la ïathuh ba ki nongïalam jong ki kynhun bapher bapher kiba don hapoh ka shatri jong ka Northeast Indigenous People’s Forum (NEIPF) kin sa ïakynduh lang ha ka taiew ban wan ha sorbah Guwahati ban shim ïa ka rai ban pynjur shuh shuh ïa ki jingïakhih.