Press "Enter" to skip to content

Ha ka Dorbar bah, dawa ka Ri Bhoi na u CM ïa ki kam pynroi bad Block I & II

Nongpoh, K’lyngkot 17: Ka Ri Bhoi Dorbar kum kawei na ka synjuk ha Ri Bhoi kaba peit ba khmih na ka bynta ban kyntiew ïa ki kam pynroi bad ka bha ka miat ki paidbah, ha ka General Council kaba la long mynta ka sngi ba ka la pynkup burom ruh ïa ki Myntri Rangbah barim bad ki MLA na Ri Bhoi ka la dawa syndon mardor na u Myntri Rangbah ka jylla, u Conrad K. Sangma ha kaba nalor ka jingdonkam ïa ki kam pynroi ka Block I & II ka dei ban phai biang sha ka jylla Meghalaya.
Ïa kane ka General Council la pynlong ha Circuit House, Nongpoh ha kaba ha ka session kaba nyngkong la wan shim bynta da u Chief Executive Member ka KHADC, u Bah H.S Shylla kum u kongsan ban pynlait paidbah ïa ka Constitution ka Ri Bhoi Dorbar bad ha ka session kaba ar pat la wan shim bynta da u Myntri Rangbah ka jylla, u Conrad K. Sangma kum u kongsan ban pynkup burom ïa ki Myntri rangbah barim ka jylla na Ri Bhoi bad kumjuh ruh ki MLA ba mynta jong ka Ri Bhoi District.
Ha kane ka sngi, nalor ki mat jingdawa ba la phah da ka dorkhas sha u Myntri Rangbah ka jylla bad ruh sha u CEM ka KHADC, ka Ri Bhoi Dorbar kum ka jingburom ïa u synñiang u bynhei bad ka nam bad ka burom ba la wan rah da kitei ki myntri barim ka jylla na Ri Bhoi bad ruh ki MLA ka la pynkup burom ïa ki da kaba ka la ai lyngba ki khusnam sah jingkynmaw ha kaba la pynkhamti da u Myntri rangbah ka jylla, u Conrad K. Sangma kum ka jingpynkuborom ïa ki.
Kitei kiba la shah pynkup burom bad ba la ioh pdiang ïa ki khusnam sah jingkynmaw na ka Ri Bhoi Dorbar ki kynthup ïa u Dr. D.D Lapang, u (L) E.K Mawlong bad u Bah J.D Rambai kum ki myntri barim ka jylla na Ri Bhoi bad ki MLA pat kiba la shah pynkup burom ki kynthup ïa u MLA ka Nongpoh, u Bah Mayral Born Syiem, u MLA ka Jirang, u Bah Sosthenes Sohtun, u MLA ka Mawhati, u Bah Dasakhiatbha Lamare bad u MLA ka Umsning, u Bah Jason Sawkmie Mawlong.
Na ka liang ka Ri Bhoi Dorbar ha kane ka sngi ka la pynkhamti ruh ïa ka Dorkhas halor ki mat jingdawa ba kynthup sha u CEM ka KHADC, u Bah H.S Shylla bad ruh sha u Myntri Rangbah ba kum ka Ri Bhoi Dorbar ka don kata ka thong ban wan rah ka jingkylla bad ruh ban dang kyntiew ïa ka bha ka miat bad ka roi ka par jong ki paidbah ha ka District.
Kumba la pynpaw ha ka Dorkhas nalor ka jingdonkam ban shna ïa ka Ri Bhoi Dorbar National Dorbar Hall, ka jingdonkam ban kyntiew kyrdan noh ïa ka Patharkhmah Administrative Unit sha ka Civil Sub Division, ban dang wan rah sa ar tylli ki Block kata ha Umden bad ha Mawhati bad ruh kiwei kiwei ki kam pynroi, ka Ri Bhoi Dorbar ka la ban khia ruh ban pynbeit noh ïa u pud u sam bad khamtam ka Block I & II ka dei ban wan phai biang sha ka jylla Meghalaya.
Haba kren ha kane ka sngi, u CEM ka KHADC, u Bah H.S Shylla u la pynpaw ka jingkmen ba ka Ri Bhoi Dorbar ka la mih ban ieng rasong bad khamtam ban pynneh pynsah ïa ki riti ki dustur bad ruh ban ïeng ïada ïa u pud u sam ha kaba ki la ban khia ba ka Block I & II ka dei ban wan phai biang sha ka jylla Meghalaya.
U la kynnoh ruh ba kane ka jingeh ha ki khappud ba dang kajia pud ka dei tang ka jingbym don kata ka jingkitkhlieh na ka sorkar jylla. U la kren ruh halor ka Instrument of Merger ha kaba ka sorkar India ka la pynrung jubor ïa ka United Khasi-Jaintia sha ka India da kaba ai ïa ka Block I&II sha ka Karbai Anglong bad ki jaka ka Karbi Anglong la ai sha Assam bad lada iaid katkum ki kyndon ka Block I&II ka dei jong ka jylla Meghalaya, namar ka jylla Meghalaya ka dei ka jylla kaba ïa ki khyndew ki shyiap la long trai da ki paidbah bad ym kumba long ha ki ri thor ba ki khyndew ki syiap ki dei jong ka sorkar.
U la ong ruh kumba long haduh mynta ngi donkam ka jingiatylli ban iada ïa ka khyndew ka shyiap bad na ka jingwan rung kynthep ki mynder ha kaba mynta ki ïa khohreh ban ïa pyrshah ïa ka CAB ha kaba lada pyntreikam tang ka ILP ngim donkam shuh ban khuslai namar ka ILP ka kham khlain bor bad ka don ka bor ban tehlakam lada iaid katkum ki riti synshar ba la pynkup bor lyngba ka riti synshar lyngba ka ILP.
Na ka liang u Bah H.S Shylla ruh halor ka dorkhas ka Ri Bhoi Dorbar u la kular ruh ban thaw ki lad ki lynti kumno ban pynioh ka lad jingiarap na ka KHADC na ka bynta ban shna ïa ka Ri Bhoi National Dorbar Hall ha Ri Bhoi.
Na ka liang u Myntri Rangbah ka jylla, u Conrad K. Sangma, haba kren ha kane ka sngi kum u khlieh duh ka jylla, u la ai ka jingiaroh kaba khraw ïa ka Ri Bhoi Dorbar ha kaba khlem da khein party ki la ia mih lang ban don ha ka Ri Bhoi Dorbar na ka bynta ban tei ïa ka Ri Bhoi ha baroh ki liang jong ki kam pynroi kiba u paidbah u dang donkam.
U la ong ruh ba ka Ri Bhoi Dorbar ka la pyni nuksa kaba bha tam sha kiwei ki District ba kim dei ban don kano kano k ajingiapher party ne ha ki kam sain hima sima ba ka dei ban kut tang ha ka por election bad na ka bynta ka roi ka par bad ka bha ka miat ki paidbah ki dei ban ia trei lang ban kyntiew ïa la ka dong ka thaiñ ban kiew shaphrang ki paidbah ha baroh ki liang.
Kumba la pynpaw da ka Ri Bhoi Dorbar lyngba ka dorkhas halor ki mat jingdawa, u Myntri Rangbah ka jylla, u Conrad K. Sangma u la ong ba ka sorkar kan shim khia bad ha kaba ïa dei bad ki kam pud ki kam sam ruh ba dang kajia pud hapdeng ka Assam bad ka Meghalaya ka sorkar ka la shim khia kumn ban thaw ki lad ki lynti ba ka jingkajia pud ka dei ban kut noh khnang ki paidbah kiba shong basah ha khappud kin nym kynduh jingeh ban kiew shaphrang ha baroh ki kam pynroi.
U la iathuh ruh ba ka sorkar ka phai khmat bha ka Ri Bhoi District ha kaba ka Ri Bhoi District la tip ruh kum kata ka ‘Aspirational District’ ba ki skhim sorkar kmie bad sorkar jylla kin treikam bha ha kane ka District ban kyntiew ïa ka roi ka par ki paidbah ha ka District. u la ong ruh ka sorkar ka la dep ban mang haduh 85 klur ban pynheh bad pynbha ïa ka surok na Umsning sha Jagiroad bad kumjuh ruh 11 klur na ka bynta ka Kolej ha Western Ri Bhoi bad kiwei kiwei ki jingdawa ka Ri Bhoi Dorbar kum ka C&RD Block bad ka Civil Sub Division ka sorkar ka hap ban dang bishar namar ban leh ha kajuh ka por ka sorkar kan nym kot bor na ka daw ka jingduna ka pisa ka tyngka kaba hap ban pyntyllun sha baroh ki kam pynroi ha ki District bapher bapher ka jylla.
Ha kaba ïa dei bad ka jingdawa ban shna ïa ka Ri Bhoi National Dorbar Hall, u Myntri Rangbah u la kular ba un iarap lyngba ka Chief Minister Scheme ha kaba u la btah ba kin pynpoi ia ka estimated plan ban shna ïa katei ka Dorbar Hall.
Kiwei kiwei kiba la ai jingkren ha kane ka sngi ki kynthup ïa u Dr. D.D Lapang bad ruh kitei ki saw ngut ki MLA ha kaba ka jingkren jongki ka long hi halor ka thong ban wan rah jingkylla ha Ri Bhoi bad shibun ruh ki la pynsgnew sha u Myntri Rangbah ba u dei ban shim khia ban pynurlong ïa ki jingdawa ka Ri Bhoi Dorbar bad khamtam ruh u pud u sam uba ki la ban khia bas hi inshi ruh kam dei ban leit sha Assam ba ka por ka la dei ban pynbeit noh ïa u pud u sam hadpeng ka Assam bad ka Meghalaya.