Press "Enter" to skip to content

Imat ka BJP ka ai sngewbha New Year da ka Citizenship Amendment Bill ïa ka NPP

Bah THS Bonney

Ha ka Shillong times 24 December, 2018 shuwa ba kan wan ka 2019, la mih ka jingthoh ba u President ka NPP jong ka Meghalaya u la pynkhreh ban ai ‘new year gift’ kaba la song bha khop ban pynkyndit ïa ka Congress. Ngim tip kaei ka jingmut kaba u President ka NPP u mut haba u ong kumta, hynrei ngi ki nongpule kotkhubor ngi khmih lynti hir hir ba ngin iohi ïa kata ka gift ba ka snem thymmai kan ai namar i pynban kumba ka BJP ka ai bun ki jingaisngewbha ïa ka NPP. Kum ban shu ai nuksa kine ar tylli ki long ki gift jong ka BJP.
1.Ka jingkhang ïa u dewïong da ka Supreme Court- Mano ba sdang ban ang nyngkong ban pyllait ïa u dewïong hadien 6 bnai lada wan ha ka sorkar ? Hato sdang ka NPP ne ka BJP? Katkum ki jingthoh ha ki kotkhubor lada ïa peit bha dei ka BJP kaba sdang ïa kane. Long kumno mynta pat? Hato ka jingkhang ïa u dewïong da ka Supreme Court naduh 15 tarik January ka dei ka “gift” jong ka BJP ïa ka NPP bad ïa ka jylla? Hato ka jingphah siew 100 klur tyngka da ka NGT ka dei ka gift ne kumno?
2. Ka gift kaba kham ishyrkhei kaba ka BJP ka ai ka dei ka Citizenship Amendment Bill kaba ka sorkar BJP ka la pass ha Loksabha.
Bun ki paitbah lehse ki iohi tang ïa ka jingma kaba ap lada ki phetwir kiba la don lypa haduh u 2014 ki ioh ïa ka jinglong traishnong ba pura ha Ri India kumba kane ka Bill ka tyrwa.
Hynrei kaba kham ma ka longba kane ka Bill mynta ka la pynshong syier lut ïa ki shi klur sawphewlak ki Hindu kiba shong suk shong saiñ ha Bangladesh haduh mynta. Ki khubor kiba mih na Bangladesh ki ong ba bun ki Hindu ha Bangladesh ki sngewsih ïa kane ka Bill kaba leh shilliang khmat bad kaba ym pdiang ïa ki muslim namar mynta ki muslim kiba bun paid ha Bangladesh ki sdang ban kdew kti ban ong balei ba ki Hindu kim leit lut noh sha India kaba kloi ban pdiang ïa ki. Lada don jingïakhih ha Bangladesh pyrshah ïa ki Hindu namar kane ka Bill, ka don ka jingma ka bym long shuh ban ïakren ïa kine ki jylla jong ngi sha North East India. Tang shu bakla, kane ka Bill kan dei ka ‘gift’ ka ban pynjynjar sat ïa ngi ha ki snem ki ban dang wan ter shi ter.
Sa kaei ka gift ba ka BJP kan ai ïa ka NPP? Ka Election MP ka la jan bad kumba long ki dak ki shin, ka BJP ka la sdang ban tlot. Ngi iohi ruh kumno bad halor kiei ki nongrim ka BJP ka kiew ha ka bor. Hato lada ka BJP ka sngewkutlad kan pyndonkam ne em ïa kita ki atiar kiba ka ju pyndonkam borabor ban poi sha ka bor?
Sa ïapeit hi maphi paitbah ïa kiei pat ki “gift’ ba ka BJP kan ai shuwa ne ynda la dep ka MP election, hynrei haba shu peit te i kumba kane ka Sorkar MDA kaba don bad ka BJP ka dei ka sorkar kaba sniewbok namar shu mih lynter ki jingeh kiba sdang naduh ba ïakhih ïa ka them Metor.