Press "Enter" to skip to content

Kyrpad ka KJDSTA ïa ka Sorkar ban pyndam noh ïa ka kyrdan Deficit Pattern

Shillong, K’lyngkot, 17: Ki nonghikai jong ki skul Deficit ha ka jylla ki la pdiang sngewbha ïa ka rai ba la mynjur da ka Kynhun Myntri ka Sorkar Jylla hynin ka sngi balang ban ithuh noh ïa ki skul kiba don ha ka kyrdan Deficit Pattern kum ki skul Deficit bapura kumba la ai jingmut da ka KJDSTA bad ka GHDSTEA ïa ka Sorkar na ka por sha ka por.
“Ngi kyrmen, da ka jingpyndamnoh ïa ka kyrdan Deficit Pattern, baroh ki kyrdan jong ki skul kin sa nang duna suki suki. Kumba la rai da ka
Kynhun Myntri, baroh ki jingmyntoi jong ki nonghikai bad ki nongtrei jong ki skul Deficit Pattern kin ioh lem mar katjuh bad ki nonghikai jong ki skul Deficit jong ka jylla naduh mynta,” ong u Babu Kular Khongjirem, President ka KJDSTA ha u kyrwoh ba la phah mynta ka sngi palei.
“Ka KJDSTA ka la kyntu ruh ïa ka Sorkar ba kan pyndam noh ïa ka kyndan Deficit Pattern ym tang ha ki kyrdan Secondary hynrei naduh ka kyrdan Upper Primary khnang ban wanrah beit tang kawei ka kyrdan jong ki skul,” ong u Babu Kular.
U la ong shuh shuh ba ka Seng ka kyntu bad ka pynkynmaw biang sa shisien ïa ka Sorkar ba kan siew ïa ki nonghikai skul Deficit ïa ki jingmyntoi New Pension Scheme, ka Modify Assure Carrier Pogressive Scheme, ban kyntiew ïa ka DCRG, ban ai baroh ki jait shuti bad kiwei kiwei kumba la ai jingmut da ka 5thState Pay Commission 2017.
Ka jingïapher hapdeng ki nonghikai skul Deficit Pattern bad ka Deficit System ka long ba ki nonghikai ka Deficit Pattern ki shu ioh tang ïa ka Basic Pay bad ka DA khlem ka Allowance katba ka ki nonghikai ka Deficit System ki ioh ïa ka Basic Pay, DA nalor ki Allowance kumba ioh ki nongtrei Sorkar.