Press "Enter" to skip to content

Lap ki shipai duriaw ïa ki met pyut jong ki lanot na krem dewïong Khloo Ryngksan

Hap phah leh DNA Test ban pynshisha
Khliehriat, K’lyngkot, 17: Ki kmie ki kpa bad ki bahaiing hasem jong ki lanot ba la shah tep im hapoh ka krem tih dewïong, mynta ka sngi palei ki la wan poi ha Ryngksan ha kaba la pyni ia ka met ba la sdang ban pra jong kiba sahkut hapoh kane ka thliew ba la ringdur video lyngba ka Underwater Remotely-Operated Vehicle (UROV) jong ki shipai Indian Navy.
Ki bahaing hasem jong ki lanot kiba la wan poi ha Ryngksan ki long, lai ngut na Lumthari bad arngut na Chirang District, Assam.
Kum ban shu pynkynmaw, 15 ngut ki nongtih dewïong ki la shah tep im hapoh kane ka krem ha Ryngksan kaba la khylllem ha ka 13 tarik, u bnai Nohprah, 2018.
Lyngba ka jingtrei shitom baradbah jong ki shipai Indian Navy, ki pulit ka Kynhun iarap NDRF lem bad kiwei kiwei ki kynhun ai jingiarap la lah ban iohi ia ki met ba la sdang ban pra bad kiba la sdang ban pyut kaba lah ban dei na ka bih kaba mih na u dewïong hapoh kane ka thliew dewïong kaba jrong kumba 210 phut.
Katkum kaba paw lyngba ki video, ka met jong kine ki lanot ba sahkut hapoh kane ka krem ka la pyut bha. Ki Scientist kiba don lang haduh mynta ha Ryngksan ki dang iakhun tyngeh da kaba pyndonkam da ki kor ki bor ban ioh sei shabar ia kine ki lanot.
Ia mynta hi, ia ka met jong ki lanot ba la sahkut hapoh kane ka krem tih dewïong la lah ban sei tang haduh 100 phut na ka jing jylliew kaba 210 phut. Kumba ka paw lyngba ka Video, ka met ka la sdang ban pra la ka jong.
Ka tyllong khubor, ka iathuh ruh ba ka durkhmat jong kine ki lanot ym lah shuh ban ithuh bad na ka liang ki bahaiing hasem ki lah ban ithuh ia la ki jong ki briew tang na ki jain ki nep ba ki phong kata ruh ynda lada dep sei shabar bad ong ruh ba don jingkyrmen ba yn sa lah ban sei lut ia baroh kiba sahkut na kane ka krem.
Halor kane, ki bahaiing hasem kin sa pyntikna lashai ka sngi thohdieng, la ki dei neem ki khun ki kti ne ki bahaiing hasem jong ki, namar ia mynta hi kim pat lah ban ithuh bha da kaba peit lyngba ka video ba la ring lyngba ka Underwater Remotely-Operated Vehicle (UROV) jong ki shipai Indian Navy.
Ka jing tan um ha Ryngksan ka dang iaid hi haduh mynta myne kumba ju long ha kaba ka Odisha Fire Service ka la lah ban pyllait ia ka um shabar kumba 405000 hajar litar bad ka mashin tan um jong ka Coal India Ltd ka la lah ban tan um 4309200 litar hapoh ka 19 kynta na ki ar tylli ki thliew dewïong ba marjan.
Katba ka Plenys–Chennai ka dang pyntreikam ia ki UROV ban wad bniah shuh shuh ia ki krem tih dewïong thliew khnai kiba don hapoh kane ka thliew dewïong ba sahkut ki nongtih dewïong. U Dr Sudhir u dang ialeh ban jurip ia ka thliew dewïong ba sahkut ki lanot khnang ban lap shuh shuh ia ka jinglong jingman shapoh jong kane ka krem.
Ka Klein Schanzlin& Becker(KSB) ka Company na Germany (Pune Base) ia mynta ka dang pykhreh shuh shuh ban pybiang ia ki mashin tan um bad ka kynhun ki Pulit NDRF ka la ai ia ka jingiatreilang bad ki kynhun bapher bapher ha Ryngksan haduh mynta.
Na ka thymmei khubor ba la iohlum na ka liang ki bor Sorkar bad ki bor ba ai jingiarap ia kine ki lanot, kin phah leh ia ka Deoxyribo Nucleic Acid (DNA) Test khnang ban ithuh la ka dei ka met jongno.