Press "Enter" to skip to content

Pdiang ka NEHU ia ka dorbarbah jong ka AIU-Vice Chancellor Meet

Shillong, K’lyngkot, 17: Ka skulbah North Eastern Hill University (NEHU) ka la pdiang ban pynlong ia ka dorbarbah kaba ar sngi jong ka All India University-East Zone Vice Chancellor Meet-2018-2019 ban iathir halor kiba bun ki mat iatai ban pynbha ia ka pule ka dangle ha ki skulbah.
Kumba 60 ngut eiei ki Vice Chancellor jong ki skulbah kiba hap ha ka East Zone ba kynthup ia baroh ki skulbah na ka thaiñ Shatei Lammihngi, West Bengal, Bihar, Jharkhand bad Uttar Pradesh kin wan iashim bynta ha kane ka dorbarbah, nalor ki heh ophisar ka UGC, MHRD, kynthup ruh ia ki ophisar ka Sorkar Jylla bad kiwei kiwei ban iatai bad iathir ha kine ki ar sngi.
U Secretary General ka AIU, u Furqan Qumar ha ka jingiakren bad ki lad pathai khubor hynne ka sngi, u la iathuh ba ki mat iatai kin long halor ka pule puthi ha ka jylla Meghalaya bad ha kane ka thaiñ Shatei Lammihngi.
U la ong ruh ha kine ki ar sngi yn sa iathir sani da kaba phaidien biang sha ki rukom ai jinghikai kiba rim namarba kane ka juk mynta ka la phaikhmat beit tang sha ka rukom hikai lyngba ka technology kaba thymmai bad ha kaba ki mashin ki la bujli noh ia ki briew.
U la ong shuh shuh ba ka pule puthi kam dei eh tang ban roi ban ban san ha ka jingwad ia ki par jingtip hynrei ban wanrah ruh ia ki jingkylla dur kiba bun ha ka imlang ka sahlang.
Haba kylli u la ong, “ngi hap ban tyllun lang katkum ka jingiaid jong ka por bad ka thong kaba ngi dei ban buh hakhmat eh ka long ban phaikhmat khamtam eh ban pynjanai ia ka pule ka pule ha ki kyrdan kiba shalor da kaba bsut ha ki samla pule ba kin tip shano ban phai.”
Na ka liang u Vice Chancellor ka skulbah NEHU u la iathuh ba ha ka dorbarbah yn sa pynkup burom ruh ia ki nongsengkam trai jylla kum shi bynta ka jingpynshlur ia ki samla ba kin sngewthuh ban ieng ha la ki jong ki kjat ynda ki la pyndep ia ki jingpule pule.
Ia mynta ki don haduh 731 tylli ki skulbah hapoh ka dewbah India kiba long ki dkhot hapoh ka AIU kynthup ruh ia 15 tylli ki Associate Member Universities na ka ri Bangladesh, Bhutan, Thailand, Kazakhstan, Mauritius, Malaysia, Nepal, UAE bad UK.