Press "Enter" to skip to content

Poi 18.92 lak ki nongthep vote, kiew 46,091 ki nongthep vote thymmai

Shillong, K’Lyngkot 17 : Ka Jylla Meghalaya ka la don haduh 18,92,716 ngut ki nongthep vote, kata hadien saw bnai ba pynthymmai biang ïa ka thup kyrteng jong ki nongthep vote.
Katkum katei ka thup kyrteng (electoral roll) kaba la pynmih paidbah ha ka sngi Palei, ki nongthep vote kynthei kiba don haduh 9,56,137 ngut ki la tam haduh 19,558 ngut ïa ki shynrang kiba don 9,36,579 ngut.
“Ha ka jingpynkhreh na ka bynta ka elekshon sha Parliament, ngi don ïa ka thup kyrteng jong ki 18,92,716 ngut kaba jan kot sha ka 19 lak ngut,”ong u Chief Electoral Officer ka Jylla, Bah Frederick Roy Kharkongor haba kren ha ka jingïalang pyllait paidbah ïa ka thup kyrteng ki nongthep vote.
U la ïathuh ba shwa kane, ka jingdon ki nongthep vote
ka long 18,46,625 ngut, kata ha ka por ba ki pynmih ïa ka thup kyrteng ba pynkhreh ha u Nailur jong u snem ba la dep hynrei ha ka thup kyrteng kaba khatduh pat la sakhi ïa ka jingkiew kaba haduh 46,091 ngut ki nongthep vote ba thymmai.
U CEO u ong ruh ba ki buh ïa ka thong ban pyndap ïa ka 1.66 persen kaba dang duna khnang ban pyntikna ba baroh kin don ha ka thup nongthep vote.
Utei u heh ka tnad elekshon ka jylla u la ong ruh ba ka jingpynkhreh na ka bynta ka elekshon sha Lok Sabha na bynta ka Shillong bad Tura Parliamentary seat ka la ïaid shakhmat. “Ngin ai ka jingïatrei lang bad ban pyrshang ban kyntiew ïa ka jingpoi ki nongthep vote ha katei ka elekshon MP,” u la ong. Kawei pat ka bynta kaba u pynpaw ka long ban wanrah ïa ki lad ki lynti ban yn ym da donkam eh ïa ki nongthep vote ban ïeng laiñ ha ki jaka sor khnang ba ki nongshong shnong kin mih paidbah ban wan thep vote. Katei ka jingkren jong u kadei halor ka jinglap ba ki briew ha jaka sor bunsien kim ju kham mih ban wan thep vote tang namar ba ki salia ban ïeng laiñ.
Na ka liang ka tnad ka la sam ruh ïa ka thup kyrteng sha baroh ki nongmihkhmat na ki seng saiñpyrthei bapher bapher ha ryngkat ka jingdon lang i Additional CEO, RP Marak bad ruh ka Deputy Commissioner ka East Khasi Hills, Kong Matsiewdor War Nongbri.