Press "Enter" to skip to content

Pyllait u DC ïa ka thup kyrteng jong ki nongthep vote

Nongstoiñ, K’lyngkot 17: U Bah T.Lyngwa Deputy Commissioner West Khasi Hill District u ba dei ruh u District Election Officer (DEO) u la pyllait ïa ka thup kyrteng jong ki nongthep vote ha ki lai tylli ki Constituency, kata ka Nongstoiñ, Rambari Jyrngam bad ka Mawshynrut.
Ki thup kyrteng kiba la pyllait ki dei kiba la pynbit pynbiang katkum ba la btah da ka Election Commission jong ka ri India. Ka jingdon jong ki nongthep vote haduh ka 1 tarik mynta u bnai kiba la pynbit pynbiang ki long, ha ka Nongstoiñ Constituency ki don 36,310 ngut, Rambrai Jyrngam 33,422 ngut bad Mawshynrut 34,924 ngut ki nongthep vote.
Kitei baroh kiba la dep pynrung ha katei ka thup ki la lah ban pyndep ïa la ka jong ka hok ban thep vote ha kaba jied ïa ki nongmihkhmat sha ki ïing dorbar thaw aiñ kum ki MLA bad MP. Ha katei ka sngi shuwa ban pyllait ïa katei ka thup kyrteng la pynlong ïa ka jingïalang ba lyngkot ha Conference Hall jong ka office u Deputy Commissioner ha kaba la pynïaid da u Bah Shanbor Warjri Additional District Magisrate ha kaba la ïa don lang ruh da u bah P.D.Sangma Additional Deputy Commissioner, u ba dei ruh u Returning Officer ka District,ki Ophisar na ki tnad trei kam bapher bapher ha poh ka Distrik, ki nongïalam jong ki Seng saiñ pyrthei na kitei ki Constituency bad kiwei kiwei.
Haba pynshai ha katei ka sngi na ka liang u Deputy Commissioner u la kyntu ïa ki nongïalam jong ki Seng Saiñpyrthei ba ki dei ban ïatreilang na ka bynta ka jingpynïaid beit ïaid ryntih ïa ka jingïathep vote ha ki por election, da kaba kin thung ïa ki nongpeit haman la ki polling station bad ki paidbah nong shong shnong ruh kin peit bniah ïa la ki jong ki kyrteng ïoh don ki jingbakla khang ba kin lah ban pynbeit ïa ki.
U la pynkynmaw ruh ba na ka bynta ban pynbeit ïa kino kino ki jingbakla na ka liang ki paitbah ki la ban pyntip da kaba shu telephone ha u Number 1950 .U la pynshai ruh ba ha ka por election lada ki paidbah, ki lap ïa kino kino ki jingpynkheiñ ïa ki kyndon aiñ da ki nongïalam jong ki Seng Saiñ pyrthei ne ki nongthep vote, ki lah ban ujor lyngba ka website jong ka National Grievances Program (NGSP).