Press "Enter" to skip to content

Pyrshah ka JSU bad SEPSD ba ïaid laitlan ki truck kit maw lyngba ka jingkieng Dawki

Jowai, Kyllalyngkot 17: Ka Jaiñtia Student Union (JSU) bad ka Society for Environmental Protection and Sustainable Development (SEPSD) kala pynpaw ka jingpyrshah kaba jur halor ka jingïaid laitlan ki trok kit maw na ka jingkieng Dawki.
Katkum u kyrwoh bala phah da ki nongïalam jong kine ki seng u Lawyerson War bad Wanbun Dkhar ki pynpaw ïaka jingpyrshah kaba jur halor ka jinglait lan ki trok ki maw ban ïaid lyngba ka jingkieng Dawki khlem da bud ryntih ïaka kyndon bala buh ka PWD ban kit ban bah ïaki maw lyngba ka jingkieng Dawki.
Kine ki nongïalam kila kyntu ïa ki bor ba dei peit jong ki ar District ka East Khasi bad West Jaiñtia ban pyrkhing ïaka jingïaid ki kali ki mar lyngba katei ka jingkieng ban lait na kino kino ki jingeh hadien habud. La kyntu ruh ïaki
nongniah kali ban bud ïaki hukum jong ka PWD bad ym dei ban kit palat ka 9 ton kawei ka kali.
Kine ki ar seng kila kynnoh bad kila lap ba ki Kali kiba wan naka thain Pynursla kiba leit pynhap maw sha ri Bangladesh ki ba kit ym duna iaka 15 ton kawei ka kali haka jaka 9 ton kaba buh jingma ïa katei ka jingkeing kaba la rim bha. La dawa na ki nongthew haka weighbridge Pynursla ba kin pyrkhing bha ïaka rukom thep ban lait na kino kino ki jingeh namar ba ka jingkieng kala synjor.
Naka Liang kine ki nongïalam kila ujor sha ka tnad PWD bad kiwei kiwei ki bor ba dei peit ïaka jingshngain u paidbah, khamtam ki nongwan jngohkai kiba hiar sha kane ka thaiñ man ka sngi.
Ki nongshong shnong ka thain Dawki ruh kila kynnoh ba ka jur ka jingkit maw palat pud ki trok naka thaiñ Pynursla bad kila pynpaw ka jingbynniaw kaba khraw ïoh ka ktah ïaka jingkieng Dawki. Kane ka jingbun ki trok kala wanrah ka jingdheng kali khlieh la ka sngi kaba la ktah ïaka iaid ka ieng u paidbah.