Press "Enter" to skip to content

Khang ki bor Distrik ïa ki nongthoh khubor ban rung ha Ryngksan

Khliehriat K.Lyngkot 19 : Ki bor pynïaid jong ka East Jaintia Hills District ki khlem ailad shuh ïa ki nongthohkhubor ban rung ha Ryngksan, ka jaka ba ki 15ngut ki nongtih dewiong ki sahkut mynta la palat shi bnai tam.
Kane ka jing bym ailad ka la pynlong ïa baroh ki nongthoh khubor ban pyrkhat ha ki rukom bapher bapher kiba ym lah ban peiphang ïa ka jingmut ba sha lydet jong ka sorkar bad ka bor District.
Hynnin ka sngi, ka 18 tarik ki bor distrik ki la shu pynieng ïa ki nongthoh khubor kumba 500 meter ka jingjngai na ka thliew ba sahkut ki lanot. Ka shimpor ruh haduh shi
kynta ba ki sa ailad ïa ki nongthohkhubor ban rung ha Ryngksan. Ym tang katta ruh ha ka por ba wan poi u DIG, u R.Chandranath ha Ryngksan ki bor District ki la khang pyrshah ïa ki nongthohkhubor bad phah ïeng sha jngai bha ha kata ka rukom ban nym iohlad ban kren ei ei ïa utei u hehduh ki pulit.
Kane ka la pynlyngngoh bad pynbitar haduh kata kata ïa ka kynhun jong nongthohkhubor kiba la wan poi ha Ryngksan hynin ka sngi. Ha kane ka sngi Saitjaiñ lei lei ki bor District ki khlem shah shuh hi tdot ban rung ha Ryngksan.
Kumba ka paw hi imat ki bor District ki kwah ïa ki nongthoh khubor ba dei ban shu hun beit tang katba ai jingtip u Public Relations Officer (PRO) ha kaba ka jingai jingtip ka long beit tang ïa ka jing tam um ki mashin nangtei.
Ym don uwei ruh u heh sorkar kumjuh ruh ki heh jong ki kynhun ai jingïarap ki ban kren ïa ki nongthohkhubor. U PRO, Bah R Susngi ruh um lah shuh ban ïakren ei ei bad ki nongthohkhubor bad ong ba ki nongthohkhubor ki lah ban ïakren bad u Bah S Kharlyngdoh, Commissioner and Secretary ka tnad Political,Shillong ha kaba ïadei bad ka jing jia ha Ryngksan.