Press "Enter" to skip to content

Hynriew ngut ki kyrtong MDC pynbna ka KHNAM

Shillong, K,Lyngkot 21 : Ka KHNAM ha ka sngi Nyngkong ka la pynbna haduh hynriew ngut ki kyrtong kiban aireng ha kane ka elekshon MDC kaban long ha ka 27tarik u Rymphang mynta u snem.
Kitei ki hynriew ngut ki kynthup ïa u Bah Filington Thangkhiew na Mylliem constituency, Bah Dimarsingh Marbañiang na Laitumkhrah – Malki, Bah Glenberth Khongwir na Mawkhar – Pynthor, Bah Khamborlang Kharshandi na Mawphlang – Diengiei, Bah Baïateilang Lapang na Umroi bad Bah Strong Kharjana na Jaïaw- Mawprem.
Kumban shu kdew hangne, ka Jaïaw kadei kaba la mihkhmat da u President bad MLA ba mynta ka Shillong North, Bah Adelberth Nongrum mynta la 10 snem.
Haba kren shwa ban pynbna ïa katei ka thup kyrteng, u Bah Adelbert u la kyntu ruh ïa ki kyrtong jong ka party ba lada ki jop kin long ki nongthaw aiñ ym ki nongleit thaw pisa. U ong ruh ba ka KHNAM hi ka don ïa ka nongrim ban shakri bad saiñdur ïa ka lawei, kumta ka kyntu jur ïa ki ba lada ki jop kin neh ha ka nongrim jong ka party.
Ha kajuh ka por u kyntu ruh ïa ki ba kin kiar na kaba kynthoh ne kdew kti ïa kiwei pat hynrei ban skhem beit ha la ka nongrim ba ki don.
Shuh shuh u la kyntu jur ruh ïa ki paidbah ka Jaïaw-Mawprem ba kin pdiang ïa uBah Strong Kharjana, u briew uba mih pli ha ka jaka jong u ban kit lang ïa ka lyngkor kum u nongmihkhmat na katei ka constituency kaba u la mihkhmat mynta la 10 snem.
Na ka liang u Bah THS Bonney, General Secretary ka party ba dei ruh u kyrtong MP jong ka KHNAM u la ong ba ka jingïai neh jong u ha ka party wat hapdeng bun ki jingeh kadei namar u ïohi ba bun ki MDC mar ïa jop ki phet noh hynrei u Bah Adelbert marwei u ieng bad khatduh u la ïoh ban jop kum u MLA.