Press "Enter" to skip to content

Sei ki pulit Assam ïa u samla ba duna bor pyrkhat na Nongma

Nongstoiñ, K’Lyngkot 28 : Ki pulit ka Assam badon ha Lower Langpih, BOP ha ka janmiet sngi Saitjaiñ ki la hiar sha ka shnong ïew Nongma kaba jngai tang kumba shi kilomitar na Langpih bad haba ki la poi ha katei ka shnong ki la khynra ïa ki ïing ki sem hapoh ka shnong da kaba thmu ban kem ïano re ïano.
Ha katei ka jingkhynra haba ki la poi ha kawei ka ïing jong ka jong ka kong Misfulness Kharsangleiñ ki la lap ïa u Arkingwel Kharsangleiñ 22 snem ba dei u para jong ka u ba don ka jingthut ha ka bor pyrkhat ki la sei jubor bad rah ïa u sha BOP.
La ong ruh ba ha katei ka juh ka miet ki la kit noh ïa u sha Boko Police Station ban pynlong ka jingtohkit kaba bniah.La ong ruh ba kitei ki arngut shipara ki dei ki khunswet ki bym don kmie don kpa shuh bad ki im sohsat bad im jynjar namar ba utei u samla nalor ba u dei uba duna ka bor pyrkhat u dei ruh u bym shait bym khlaiñ shilynter.
Hadien ba ki pulit Assam ki la rah noh ïa u na ka liang kiba ha ïing jong utei u ba shah kem ki la pyntip ïa katei ka jingjia sha u Bah Kimfa S Marbañiang, MLA ha kaba u la leit sha Boko ban ïakren bad ki pulit Assam hynrei na ka liang ki pulit Assam kim shym la pynsngap.
Nalor kata ki la ong ruh ba kim lah ban pyllait namar ïa ka mokutduma la dep register bad ïa utei u ba shah kem kin sa phah noh sha ïIngbishar ha Guwahati. Ha dien kata utei u MLA u la wan phai thylli noh khlem lah ban leh ei ei .Kumta ha ka janmiet sngi U Blei kiba ha ïing jong utei uba shah kem ki la leit ban ïakynduh ïa u bah K.P.Pangniang MLA /MDC ba rim katei ka thaiñ bad ha ka step sngi nyngkong u Bah Pangniang u la leit sha Boko bad ha shuwa ban phah ïa utei u ba shah kem sha ïngbishar u la poi sha Boko Police Station.
Ha katei ka por ma u, u Bah Hindro Samakha ryngkat bad ka kong Misfulness Kharsangleiñ ki la ïoh ban ïa kynduh ïa u Officer Incharge bad ha ka jingïakren kaba la neh slem bha ki la kyrpad ban pyllait noh ïa utei u samla .La ong ruh ba ki bor pulit ki la sngap bad pdiang ïa ka jing kyrpad jong u Bah Pangniang ha kaba ki la pyllait jamin noh ïa utei u samla bad ki la wan phai da kaba suk ha la ïing la sem jong ki.
Nalor kata u bah Pangniang u la ïathuh ruh ba ha katei ka jing ïakynduh jong u bad ki heh pulit ka Boko ki la ïoh lad ba ïakren sani bha halor ka shong suk shong saiñ ha ka thaiñ Langpih bad na ka liang ki heh pulit jong ka Boko ruh ki la kular ban ïatrei lang bad ban ïa pyntip kylliang lada don kino kino ki jingeh ha katei ka thaiñ kiba lah ban ktah ïa ka shongsuk shong saiñ jong ki paitbah.
U Bah Pangniang u la ïathuh ruh ba ki heh pulit ka Boko ki la mynjur ïa ka jingkyntu jong u ba lada jia kino kino ki jingeh ki pulit Assam kim dei ban shu kem klumar ïa ki nongshong shnong katei ka thaiñ lymda kim don ïa ki sakhi satar kiba biang bad khlem ka jingtip jong ki nongsynshar shnong namar ka lah ban ktah ïa ka shong suk shong saiñ bad ka lah ban wanrah ruh ïa ka jingïakhih paitbah kaba jur.