Press "Enter" to skip to content

Hiar jurip u CEM bad ka jingtih maw bad tih khyndew ka la ktah ïa ka mei mariang

Jyllei ka tih maw bad khyndew ha Rani Jirang
Nongpoh, Rymphang 07: Hadien ba bun ki paidbah ki la ujor syndon sha u CEM ka KHADC halor ki jingjyllei ki kam tih maw bad ki kam tih khyndew ha Rani Jirang, u CEM ka KHADC, u Bah H.S Shylla hynnin ka sngi da lade hi u la leit hiar ban jurip ha ki thain Khappud ka Meghalaya bad Assam ha kaba da lade hi u la sakhi ba ka dong ka jingtih maw bad tih khyndew pathar kumba la ujor da ki paidbah.
Kumba la ujor da ki paidbah, u Bah H.S Shylla u la lap ba ka long shisha kumta bad la kynnoh ruh ba kane ka jingtih maw bad tih khyndew pathar ha ki thain khappud ka Jirang la kynnoh ba la leh donbor da u Syiem ka Hima Jirang.
Haba kren bad ki Nongthoh khubor, u Bah H.S Shylla u la ong, kumba u la lap ba ka don shisha kata ka jingtih maw bad tih khyndew pathar kaba la buh jingma ïa ka jaid bynriew bad ka jylla la sngewthuh ba kane ka jaka ba la tih maw bad tih khyndew ka dei jong ka Hima bad ym jong ki riew shimet bad ka rai ba khatduh ban pynsangeh ïa kine ki kam ka dei hi ka rai jong ki paidbah.
Kumba la pynpaw da u CEM ba ka rai ka long ha ki paidbah, na ka liang u Syiem ka Hima Jirang ruh u la kubur ba un lum kyrkieh ïa ka Dorbar Hima na ka bynta ban pynbeit halor kine ki kam tih maw bad tih khyndew kaba la buh jingma ruh wat ïa ka mei mariang.
Na ka liang u CEM, u Bah H.S Shylla, u la ong ruh ba la donkam kyrkieh ban shim khia halor kine ki kam tih mad bad tih khyndew, namar ba bu ki lum ki la madan bad ka lah ban leit sha ka Assam ha kaba bun ki nongtrei ruh kid ei ki bar jylla na Assam ha kaba ki Khasi ki dei tang ki nongpynshah kyrteng.
U la ong ruh ba kine ki ba pyntih maw bad pyntih khyndew ruh ki dei tang ki shi ïing bad ki dei ki briew jong u Syiem bad kane ka long pyrshah ïa ka riti ka dustur.
Shuh shuh, na ka liang u Syiem u la ong ba un dang pynlong biang ka jingjurip ïa kitei ki kam tih maw bad tih khyndew kaba la pynjot ïa ka mariang bad buh ruh ka jingma ïa u pud u sam ban sa don lang ruh naduh ki tnad sorkar kaba long ruh shi bynta ban pynskhem ïa u pud u sam khnang ba ki jaka kim dei ban leit sha ka jylla Assam.
Halor kane ka jingleit jurip ïa kitei ki kam tih khyndew bad tih maw ba la leh donbor da u Syiem kumba la kynnoh da ki paidbah, ka Kur Phrakpoh Pahsyntiew Wahlang, ka CORP, ka JACHJ, ki riew rangbah bad ki paidbah kiba la leit lang ban jurip ki pyrshah jur ia ka jingleh jong u Syiem bad ki katto katne ngut ban tih maw haduh ba ki lum ki la madan ha ka khyndew jong ka Hima khlem da ioh ia ka rai ka dorbar hima.
Haba bi shar bniah bha halor kane ka jingtih khyndew bad tih maw ha Rani Jirang ka long shisha kaba la ktah jur ïa ka mariang, namar bun ki lum ki wah ba itynnad bad jyngam ki la kylla madan plain naduh ka shnong Gunpaty haduh u lum Wahsieng da ki phew kilometer shi lynter u pud bad ka Assam.