Press "Enter" to skip to content

Ka Jylla bad ki ADC mynta ka kynti ki kyrduh nongïalam: Ong u Bah Paul

Shillong, Rymphang, 07: U Working President ka United Democratic Party (UDP) u Bah Paul Lyngdoh, uba long ruh u kyrtong ïakhun ïa ka elekshon MDC na Jaïaw-Mawprem Constituency, u la ong ba ka Jylla bad ki Automous District Council ha kane ka kynti ki don hapdeng ka jingthylli ïa ki nongïalam.
“Ngi donkam ban pynshlur da kaba sdang na lade ban mih shakhmat khamtam ïa ki briew kiba don ïa ka jinglong kaba kyrpang. Ha kine ki snem baladep ki District Council kim shym la lah ban treikam katkum ka jingkitkhlieh ba la pynkhamti ha ki bad kane ka pynshong kynrong ïa ka jingshkhem jong ki trai ri trai muluk bad nga kwah ban ïohi ba ka EC kaba thymmai jong ka KHADC kan don ka jingïatrei ryngkat bad ka Sorkar Jylla namar ka lynti kaba ki ADC kaba ki shim baroh shikatta ki ïatyngkhuh baroh shikatta, dei na kane ka daw kaba khynniat ïa nga sha kane ka lympung,”u la ong.
Halor ka jingkynnoh ba lada u jop un sa leit phai biang ban ïakhun ïa ka elekshon MLA ha u snem 2023 na West Shillong Constituency, u la ong, “ka State Assembly bad ka District Council ki dei la ki jong ki bynta bad ki constituency ki ïapher, ka shu jia ryngkhat ba ki don ki shnong ki dei jong ka West Shillong bad ka North Shillong hynrei ha ka District Council kine ki la dei lypa ki bynta jong ka Jaiaw Constituency. Lada phi shim ba ka District Council ka wan hangne ha ka snem 1952, ka la shwa ar phew snem ïa ka Jylla Meghalaya.”
Ha kaba ïadei bad ka jingïakhun pyrshah ïa u Bah Auguster Jyrwa, u kyrtong ka Seng Congress uba long ruh u General Secretary barim ka KSU, u la ong, “u Auguster lada phi ong ha ka jingïadei ha ka KSU u long kum u ksiew jong nga, nga la don ar samoi shwa ïa u ha ka KSU, ka Jaïaw Constituency ka donkam ïa ki briew kiba ïar jingmut bad kiba ladep shah tynjuh bad nga la don ha ka KSU 10 snem, ha Assembly 15 snem bad dei namarba ïohi ba kane ka jingduna nongïalam ha Distirct Council ka la pynlong ïa nga ban rung ha kane ka lympung.”
Ka KHADC dang shen ka la wanrah ka Bill ban pynlong aiñ ïa ka Inner Line Permit (ILP) hapoh u pud u sam ka District Council ha rilum Khasi.
Halor kane, u la ong, “dei ma ngi na ka UDP kiba la wanrah ïa ka Adjournment Motion ha u snem 2013. Naduh u snem 2013 ngi la kyrshan ban dawa ïa ka ILP bad mynta ka kynti ngi ïohi ba ka District Council ka ladep leh la ka jong ka bynta, bad kan khambha ïa ka aiñ ILP ban leh da ka Sorkar Jylla namar ngi sngewthuh ba kane ka aiñ ka dei kaba don bniat bad kaba khlaiñ bor ban pyntreikam ha baroh kawei ka jylla namar ngi sngewthuh ba ka ILP ba la mynjur da ka KHADC kan treikam tang hapoh ka Schedule Area. Nga da ïaroh tyngeh ïa ka jingleh jong ka KHADC namarba ka don ïa ka jingsngewkhia ïa ka jingeh jong ka jaidbynriew.”
U Bah Embhahlang B. Syiemlieh, u kyrtong ka UDP na Mawlai Constituency u la ong ba ka jingmih ïakhun biang jong u ïa ka elekshon MDC ha kane ka kynti ka dei halor ka nongrim ba u ïohi ha kine ki san snem ka jingbym skhem nongrim jong ki nongmihkhmat kiba la leit noh bad ka jingpynkylla nongïalam ba khah khah ha District Council kaba wanrah jingeh ïa ki paidbah ka jylla.
Une u samla rangbah uba la long teng u MDC ka Mawlai Constituency ha u snem 2009 u la ong ba ka thong kaba u don mynta ka long ban ïohi ba ka Village Adminstration Bill kan long aiñ bad kan ïoh ïa ka jingmynjur na u Lat ka Jylla.
“Ha u snem 2009, ngi la sdang nyngkong eh ha ka VAB hynrei mynta la shu pynlong politik ïa kane ka kam. Nga ïohi ba ka KHADC mynta ka la kylla long ka mar khaii na ka bynta ka jingmyntoi shimet jongno re jongno. Ka District Council ka dei ka nongkynti jong ki padbah bad kam dei jong tang jong ki ar ne lai ngut,” u la ong.
Haba kylli u la ong, “u Bah Teibor bad u Bah Marbud ki dei ki paralok bad shym la ïakhun pyrshah ïa ki hynrei nga ïakhun ïa ka elekshon na ka bynta ka jingeh jong ka jaidbynriew.”
U Bah Pynshgaiñ N. Syiem, u kyrtong ka National People’s Party (NPP) u la ong ba ka jingïakhun jong u na Mawkhar-Pynthorumkhrah Constiteuncy ka dei kaba u la buh jingmut lypa naduh shwa ka elekshon MLA 2014.
“Ngin ïa ap ïa ka rai jong u paidbah haduh ka 27 tarik ïano un jied,” ong une u MLA bad MDC barim ka Mawsynram Consttieuncy uba hap ban ïakhun pyrshah ïa u Sitting MDC ka Mawkhar-Pynthorumkhrah Constiteuncy u Bah James Ban Basaïawmoit kiba la ïadon bynta lang ban pynkha ïa ka PDF.
Haba kylli halor ki thong treikam u la ong, “ka ishu Rangbah Shnong, ka VAB bad ka jingbishar bniah ïa ka aiñ shna iing ki dei ki mat treikam kiba ngan dang hap ban buddien biang lada nga ïoh ïa ka jingjop.”
Ka Kong Amanda Annette Pakynteiñ, ka kyrtong jong ka PDF na Mawkynrew Constituency ka la ong ba ka jingmih ïakhun jong ka ha kane ka Elekshon MDC ka dei namarba ka iing ka sem ka dei ka iing shakri paidbah kumba long u kurim, u Bah Banteidor Lyngdoh Mawphlang, uba long mynta u MLA ka Mawkynrew Constituency.
Haba kylli ïa ki mat treikam, ka la ong, “ngi ïohi ba ka jaidbynriew Khasi ka long tang shi shamoit hapdeng ka duriaw bah bad ka jingdon jong ka Sixth Schedule ka dei ka stieh ïada ïa ka khyndew ka shyiap bad ka riti ka dustur bad ka kham dei hok ruh ïa ka longkmie ban leit ha District Council namarba ka dei ka nongri nongsumar ïa ka riti ka dustur bad ïa ka khyndew.”
Ka la ong ruh ba ka jingmih ïakhun ïa ka elekshon ka dei ka jingkwah bad ka jingangnud kaba wan na hi na paidbah ym na u Kurim jong ka.
U Bah Melamshwa Rynjah u kyrtong ka PDF na Nongkrem Constituency u la ong, ba u don ka jingskhem jingmut khlem kynran dien ban ïakhun pyrshah wat ïa u MLA ba mynta ka Nongkrem Constiteuncy u Bah Lambor Malngiang.
“Nga dap da ka jingkyrmen ba nga ïoh ïa ka jingkyrshan na ki samla bad na ki paidbah bad nga kyrmen ba ngan ïoh rah ïa ka thong,” u la ong.
U Bah Wansalan Lyngwa, u kyrtong shimet na Mawkhar Pynthorumkhrah Constituency u la ong ba ka jingmih ïakhun ïa ka elekshon ka long halor ka nongrim ba ka jaidbynriew ka donkam ïa ki nongïada khamtam ha kane ka kynti ka jingwanrah jong ka Sorkar India ïa ka Citizenship Amendment Bill.
“Nga ieh ha ka jingstad jong ki paidbah ban rai,” ong u Bah Wansalan haba pynpaw ba um don kano kano ka jingsheptieng ban ïakhun pyrshah ïa u Sitting MDC u Bah James Ban Basaïawmoit bad ïa u CEM barim ka KHADC u Bah PN Syiem.