Press "Enter" to skip to content

Myllung ki paidbah ba wan peit Phlim Nabon, bun kiba jaw ummat ba isynei

Ai jingmut u Moderator ban pynpoi shaduh Wales

Shillong: Hadien kumba arsnem ka jingap khmih lynti, ïa ka Phlim Nabon, ba la pynmih da ka Jingïaseng Samla KJP Synod Sepngi, la pyllait paidbah mynta ka sngi ha ka jingïalang kabala long ha ophis ka KJP Synod Sepngi, Mission Compound, Shillong.
Hadien kane, ïa kane ka phlim ba la pyllaitda u Moderator ka KJP Synod Sepngi, u Rev. WC Khongwir, la pyni nyngkong eh(Premiere) ha Auditorium jong ka Synod College. Katba nang ïaid kane ka phlim, la ïohi ïa ka jinglung mynsiem ki paidbah ha kaba bun ki la jaw ummat, khamtam eh ha ka bynta ba ka Nabon, ka la mih na la ka jong ka ïing da kaba kyntait ïa ka jingtyrwa ka kmie ka ksiar ka ksah bad ki jingdon jingem ban leit phai sha ïing Mission ha Nongsawlia, namar ba ka la jied ban shakri ïa U Jisu.
U Rev. Khongwir, haba kren shuwa ban pyllait ïa ka Phlim, u la ong ba ka jingim ka Nabon, kaba long tang ka khynnah rit ha ka por ba ka pdiang ïa U Jisu bad ki jingeh ba mad ha kane ka jingïaid lynti jong ka, ka long ka jinghikai ïa kito baroh kiba bud ïa U Jisu ba ka jingim kiba ngeit kam dei kaba suk, hynrei kadei ka jingim kaba hap ban ïakynduh bad mad bun ki jingeh. “Haduh mynta ruh, ki Khristan ha kylleng ka pyrthei ki mad ïa ki jingeh ha ka jingim jong ki”, u la ong.
U Moderator, u la pynpaw ka jingsngewkmen ba kane ka Project jong ka Jingïaseng Samla ka la long poi sha ka jingpyndep ïa ka bad ka la long kaba jop. Hynrei u la ong ba ka kaba kham kongsan eh ka long kumne ba lyngba kane ka Phlim, ki paidbah, ym tang ki Khristan kin ïa ka khubor kaba bha na ka.
U la ai jingmut ruh ba ïa kane ka Phlim dei ban pynpoi shaduh ka General Assembly Presbyterian Church of India, khnang ba ki paidbah ha ri India kin ïoh ba peit. U la ai jingmut ruh ban pynpoi wat shaduh Wales, kaba long ka Balang Kmie jong ka Balang Presbyterian ha Ri Khasi Jaiñtia.
U Bah KK Kharlukhi, Director ka Phlim, haba ai jingkren shuwa ka jingpyni paidbah, u la ong kane kadei ka Phlim kaba la shna halor ka jingjia ba shisha lyngba ka jingwad bniah u (L) Dr. HB Kharlukhi, uba la thoh ruh ïa ka Script ha ka dur jong ka Drama.
Kane kadei ka phlim kaba bun tam ki nongïashim bynta, ha kaba palat arspah ngut ki briew ki la ïashim bynta bad kidei ruh kiba ïashim bynta ha ka sien kaba nyngkong eh ha ki phlim.
Khyndiat shaphang ka Nabon: Ka Nabon kadei na ka jait Sawian na ka Shnong Mawmluh. Kane ka khynnah ka la ïoh lad ban bteng ïa ka jingleit skul jong ka ha ïing Mission ha Nongsawlia. Dei lyngba ka jingleit skul jong ka ba ka la nang ban pule ïa ka Bible bad ryngkat ka jinghikai ba ka la ïoh na ki Missionary khamtam na ka Mem Lewis ha Skul, ka la rai ban pdiang ïa U Jisu bad ban long Khristan. Pynban kane ka rai jong ka, ka la ïakynduh jingeh ha ïing hasem, ha kaba ka kmie, u kñi bad bad kiwei ki la khang ïa ka ban long Khristan bad namar kane ka daw, ka la mad bun ki jingeh. Hynrei ka Nabon, ka la la ïeng skhem ha ka jingngeit jong ka bad ka la rai kut ban long Khristan, wat lada kiba haïing hasem ki la ai khawduh ïa ka.
Ka la kylla long ka Kynthei ba nyngkong eh ban long Khristan, ha kaba la pynbaptis ïa ka ha ka 16 tarik u Naitung 1848. Ka la khlad noh haba ka dang dap tang 25 snem ka rta.
Ka phlim kadei shaphang ka jingim jong ka. La pynbit pynbiang ïa kane ka Phlim da ka Filmtel bad Carols Production. Nalor ka Jingïaseng samla KJP Synod Sepngi kaba dei ka nongkyrshan (Producer) la bynrap lang da ka Jingïaseng Kynthei KJP Synod Sepngi kum ka Co- Producer.
Ïa kane ka Phlim, yn pyni paidbah ha ka 23/2/2019 por 8 PM ha Ka Jingïaseng Samla Synod ha Nongpyndeng bad kawei pat ka jingpyni paidbah kan sdang naduh ka 26/2/2019 ha Community Hall cum Indoor Stadium jong ka Dorbar Shnong Mission Compound, Shillong.