Press "Enter" to skip to content

Sa lai ngut ki kyrtong MDC ki la pyndep thep kyrteng ha Ri Bhoi

Nongpoh, Rymphang 07: Ki lai ngut ki kyrtong MDC na Ri Bhoi mynta ka sngi ki la pyndep ka jingthep kyrtengna ka bynta ban pynpura kum kita ki kyrtong ki ban ioh ban ïa khun ha kane ka election MDC na Ri Bhoi ban leit mihkhmat sha ka ïing thaw aiñ ka KHADC lada ki paidbah ki kloi ban pynjop ïa ki.
Kitei ki lai ngut ki kyrtong kiba la pyndep ban thep kyrteng mynta ka sngi ki kynthup ïa u Bah Donlang Sohkhlet, kyrtong ka HSPDP na Umsning Constituency, u Bah Patbun Syngkli, kyrtong ka PDF
uba la pyndep pura ban thep kyrteng mynta ka sngi ban ïa khun na Nongpoh Constituency bad u Bah Arban Sutnga kyrtong ka Janata Dal United (JDU) kaba dei ka party ba dang thymmai ha Meghalaya uba la rai ban ïa khun na Umroi Constituency.
Kitei ki lai ngut ki kyrtong haba ia kren bad ki nongthoh khubor hadien ka jingwan thep kyrteng ki la pynpaw la ka jong ka jingangnud ban shakri sha ki paidbah bad ki la ong ruh ka daw kaba la pynlong ïa ki ban aireng ha kane ka election MDC ka dei ka jingangnud ban ai ka jingshakri na ka bynta ka jingdonkam ki paidbah.
Kumba ka District Council ka dei kawei na ka ïing thaw aiñ kaba peit kyrpang ïa ki riti ki dustur bad ban pynnneh pynsah ïa ka khyndew ka shyiap, kitei ki kyrtong ki la pynpaw ruh ba ka bynta kaba hakhmat eh ba kin leh ka dei ban pynkhlaiñ ia ka jaid bynreiw bad khamta naduh ki riti ki dustur bad ki khyndew ki shiap khnang ba ka pateng ban sa wan jong ka jaid bynriew kan long kaba shai bad kaba dap da ka jingkyrkhu kyrhai.