Press "Enter" to skip to content

Sha ïingbishar byrngem ujor u CEM ïa ka sorkar halor ka ILP

Shillong, Rymphang 07 : U Chief Executive Member ka Khasi Hills Autonomous District Council (KHADC), Bah HS Shylla u la byrngem ban ujor syndon shaduh Supreme Court ne High Court pyrshah ïa ka sorkar jylla namar ba ka ong ba ka District Council kam don bor ei ei haba ïadei bad ka jingpyntreikam ïa ka aiñ kum ka Inner Line Permit.
Haba kren bad ki lad pathai khubor, u CEM u la ong la kumno kumno ha ka taiew ban wan kin phah noh ïa katei ka jingujor la ka long ha ka rukom jong ka Writ Petition lane ha kano kano ka rukom. “Ngi la dep ban ïa kren bad u nongïasaid bad ka shong mynta ha u la ngin ujor sha Supreme Court lane sha High Court,” bynrap shuh shuh u CEM.
La ïathuh ruh ba katkum ka shithi kaba wan na u Deputy Secretary ka tnat District Council Affairs ka sorkar ka la pynpaw ba da ka jingsyllok bad ka Law Department la ai jingmut ba ka Regulation kaba la tip kum ka “The Khasi Hills Autonomous District (As adapted from the Bengal Eastern Frontier Regualation, 1873) Regulation, 2018” ïa kaba la wanrah bad mynjur da ka Council ha ka 26tarik u Risaw, 2018 ka dei shabar ka bor jong ka District Council ban thaw aiñ katkum ka Sixth Schedule jong ka Riti Synshar jong ka Ri.
Shuh shuh u la ong ba dei ka jingtïeng ïa ka shi taiew ba ai por ka Dorbar Bah kaba pynlong ïa ka sorkar ban phah da kum katei ka shithi kaba thoh ba ka jingdawa kam ïahap hapoh ka Sixth Schedule.
Nalorkata, u la pynpaw ba ka sorkar ban khanglad ïa katei ka sienjam, ka lah ban ruh wanrah noh mardor da ka synshar Administrator hapoh KHADC. “Nga kyrpad ïa ki MDC ba thymmai ba kim dei satia ban long ki ‘si samkhmut ha ki party ba ki don ban weng noh ïa katei ka jingujor kaba u phah la ka long sha Supreme Court lane High Court. Ka shong ruh ha u CEM ba thymmai ban buddien ba yn ym ailad ban weng noh ïa katei ka jingujor namar kadei na ka bynta ka jingmyntoi jong ka Jaidbynriew,” u la ong.
Shuh shuh u la ong ba ki paidbah ki dei ban ïoh ïa ka ILP hynrei ka sorkar kala shu lehkai ïa ka por da kaba pynslem da kaba phah da katei ka shithi.