Press "Enter" to skip to content

Thep kyrteng uwei ha WKH, 2 ngut ha SWKH

Nongstoiñ, Rymphang 6: Napdeng ki kyrtong kiba la pyndep ïa ka jingleit thep kyrteng na ka bynta ka elekshon MDC, u kyrtong ka party UDP Nongstoiñ Bah Tonington Tyrsa u la leit ban thep kyrteng hynne ka sngi ha DC Ophis Nongstoiñ.
Ha ka jingleit thep kyrteng jong u, la synran lang da u Bah Mosklandar Marngar, bah Morning Tympuiñ bad kiwei kiwei. Na ka liang u Bah Toning u la pynpaw ba lada ki paidbah ki jied ïa u ban mihkhmat sha District Council, un peit un jngoh ïa ka bha ka miat ki paidbah ha baroh ki liang kiba ïa dei bad ka roi ka par bad kiwei de ki jingeh, kham kyrpang na ka bynta ki kup shilliang ki sem shilliang jong ka imlang sahlang.
Na ka liang ki nongïalam ka UDP, ki la pyntip ruh ba ha ka 12 tarik mynta u bnai yn pynlong ïa ka jingïalang bah jong ka party ha Hall Mecofed ha ka por 11 baje mynstep. Ha katei ka sngi yn donlang ki nongïalam jong ka party ba kynthup ïa u Bah Donkupar Roy, Bah Jemino Mawthoh bad Bah Bindo M Lanong.
Ha South West Khasi Hills pat, kiba thep kyrteng ki kynthup ia u kyrtong ka HSPDP na Mawkyrwat Bah Bah Nolip Lyngdoh, katba uwei pat u dei u kyrtong shimet uban ia khun kum u kyrtong shimet na Langrin constituency, Bah Sisferykansis Wanniang
Kumta haduh mynta ka jingdon jong ki kyrtong MDC kiba la dep thep kyrteng na ka bynta ban iakhun ia ka ilekshon MDC na Mawkyrwat ki don haduh 4 ngut, kata, u Bah Hadrian Lyngdoh, Bah Anvil Lyngdoh, Bah Carness Sohshang bad u Bah Nolip Lyngdoh. Ha kaba iadei bad ka Langrin Constituency pat ki kyrtong ki kynthup ia u Bah Airmarshall Diengngan na ka Congress, Bah Kitborlang Nongrem na ka NPP, Bah Nassar Marwein na ka UDP bad u Bah Sisferykansis Wanniang kum u kyrtong shimet.