Press "Enter" to skip to content

Hiar jurip ka KSU ïa ka Pynursla CHC, ym hun ïa ka jingshakri paidbah

Shillong, Rymphang, 10: Ka Khasi Students’ Union (KSU) Pynursla Unit ha ka taiew ba ladep ka la hiar jurip ïa ka Community Health Centre, Pynursla bad lap ba kane ka jaka ai jingsumar ym don doktor bad ka Emergency Room ruh ka thylli.
“Ha kane ka por ngi lap ba don iwei i nongpang iba donkam ka jingïarap kyrkieh na u doktor ha ka por ba ngi leit jurip,” ong u Vice President ka seng u samla Vorrozislov Sohkhlet. “Ka Nurse kaba don duty ruh ka don marwei bad u chowkidar ruh um don,” la ong une u nongïalam.
U ïathuh ba ki dkhot ka seng ki la ïohlad ban ïakren bad kiba shah sumar ha kane ka CHC ki pynpaw beit ba kam biang satia ka jingai jingsumar na ka liang ki doctor, ki nurse, ki dawai bad kiwei kiwei ki jingdonkam ïa ki nongpang.
“Ngi ïoh jingtip shuh shuh ba bunsien ha por mynmiet ki nongpang kim ju lap ïa ki doctor khamtam eh ha ka por ban pynkha khyllung bad lada ki lap doctor ruh ki lap tang ïa u doctor homeopathic,” u la ong shuh shuh.
“Kane ka pynpaw ïa ka jingduna bad jingdkoh treikam palat kane ka CHC,” u la ong bad ong ruh ba kane ka CHC ka duna ïa ki doctor bad kiwei kiwei ki nongtrei ïa kaba la iathuh da u Dr. E. Khongthaw uba dei u Incharge kane ka CHC.
U la ïathuh ba ka seng ka la leit ïakynduh ruh dang shen ïa ki bor pynïaid ka Directorate Health Services (DHS) bad ki la ai ka jingkular ban phah doctor shuh sha kane ka CHC hynrei haduh mynta ka jingïakren ka sahkut tang ha ki jingkular.
“Hooid ki la pynpaw ba ka jylla Meghalaya ka duna ïa ki doctor bad ka long kaei kaei kaba sngewkhia shibun ban tip ïa kane,” u la ong. U la ïathuh ba ki tiar ki tar ban sumar katkum ka juk mynta ruh kim satia don ha kane ka CHC.