Press "Enter" to skip to content

ïapher jingmut u President bad Working President

Shillong, Rymphang 10 : Ka United Democratic Party (UDP) kaba dei kawei na ki party riewlum ba heh tam ha ka Jylla dang shen ka la pynpaw pyrthei ba ka don ar sur ne ka jingïapher jingmut haba ïadei bad ka ishu Inner Line Permit, kaba dei kawei na ki ishu kaba la sdang ban khie im biang ha kane ka jylla.
Katei ka ishu ILP ka la ïoh ban khie-im biang hadien san snem dei lyngba ka jingwanrah bad jingmynjur jong ka Khasi Hills Autonomous District Council (KHADC) da ka
thong ban teh lakam ïa ka jingtur kyrthlep ki briew kiba nabar jong ka jylla ban wan buhai shnong. Wat na ka liang ki sengbhalang ba ïalam da ka HYC ruh ki mynjur bad kyrshan radbah ïa katei ka Bill ba wanrah da ka Council kaba la poi haduh ban da pynlong syndon da ka Dorbar Bah ha kane ka taiew ba la dep.
Haba kren bad ki nongïalam ka UDP halor katei ka phang dang shen, u President Rangbah ka party, Dr. Donkupar Roy u la pynpaw ba kam long satia ban leh kyrkieh halor ka ILP watla kadei ka sobjek kaba la dep ban ïa kren bunsien bad bun snem. Nalorkata, u la ong ruh ba kam long satïa kaba suk ban rai hakdak halor katei ka phang. Hynrei u ong pat ba ka kham kongsan ban da ïoh shwa ïa ka jingsngew na ki paidbah khnang ban sngewthuh kiei ki jingeh kiba lah ban mih bad ktah ïa ka Jaidbynriew.
Kaei kaba utei u hehduh ka party u pynpaw ka long halor ka ishu Citizenship Amendment Bill da kaba ong ba ka bynta kaba kum ka party ka ïakhun ka long ban ym ailad satia ba kita kiwei pat ki rit paid ne kynhun niam kin ïoh ban rung ne buhai shnong ha ka kane ka jylla watla ka BJP ka thmu ban ailad ïa ki paid Hindu ne kiwei ki kynhun niam na kiwei ki ri ban ïoh long nong India.
Katba na ka liang u Working President katei ka party hi, Bah Paul Lyngdoh uba dei ruh u kyrtong MDC na Jaïaw u la ïathuh ba dei ka UDP hi kaba wanrah ïa ka Adjournment Motion ha u snem 2013 ha kaba ki la kyrshan ban dawa ïa ka ILP.
Da kaba ïaroh ïa ka KHADC kaba la mait lynti halor katei ka phang, u Bah Paul u la ong ruh ba kan khambha ba ïa ka aiñ ILP yn leh da ka Sorkar Jylla namar ki sngewthuh ba kane ka aiñ ka dei kaba don bniat bad kaba khlaiñ bor ban pyntreikam ha baroh kawei ka jylla namarba ka ILP ba la mynjur da ka KHADC kan ïoh ban treikam tang hapoh u pud jong ka hi.
Lah ban kdew hangne ruh ba kiba bun ki kyrtong MDC jong ka UDP ki la ieng lang ha kajuh ka nongrim ryngkat bad u Working President, kata ban kyrshan ïa ka jingdawa Inner Line Permit.
Katei ka ishu ILP ka la pynlong ruh ïa u Chief Executive Member (CEM) ka KHADC, Bah HS Shylla ban byrngem ujor shaduh High Court ne Supreme Court pyrshah ïa ka sorkar jylla halor ka jingkyntait jong ka ban pyntreikam ïa ka ILP ba la wanrah bad mynjur da ka Council.