Press "Enter" to skip to content

Ïoh mynsiem u kyrtong HSPDP ba pyniasoh biang u Dr Pariong

Nongstoiñ, Rymphang 9: Shi sngi hadien ba u Bah L.G.Nongsiej kyrtong ka Hill State People Democratic Party Nongstoiñ Constituency u la dep thep kyrteng na ka bynta ka MDC election ka ban long ha ka 27 tarik mynta u bnai, ki spah ngut ki paidbah nongkyrshan naduh ki longkmie bad ki samla ki la wan phai biang ban kyrshan ïa u.
Ka jingwan phai jong ki ryngkat ki riew rangbah ba kynthup ïa u Bah Lostar Lyngkhoi, Doctor A.Parïong, u Bah Kwik Lyngdoh bad kiwei kiwei ki riew rangbah ka la ai mynsiem shuh shuh ïa u Bah Nongsiej bad ïa ka party hi baroh kawei.
Ka jingwan phai ki riew rangbah la sakhi mynta ka sngi ha ka jingïalang kaba u Bah Nongsiej u la pynlong ha Bishop Hall New Nongstoiñ. Ha kane ka jingïalang la ïadon ryngkat da u Bah K.P.Pangñang President rangbah jong ka party, Bah Witting Mawsor MLA ba rim ka Mawshynrut bad u Doktor Adviser Parïong MLA barim ka Mawthadraishan. Ha ka jingïalang, ki nongkren ba kongsan ki long u Bah Ioanis Diengan na ka thaiñ Maweit, Bah Lostar Lyngkhoi na Nongstoiñ, Bah Nondi Diengngan, Bah Rostar Marbañiang, Bah Witting Mawsor, Bah K.P.Pangniang bad u Doctor Adviser Parïong. Kitei ki rangbah haba kren ha katei ka jingïalang ki la ong ba ha kine ki bnai ba la dep ki la mih shibun ki jingkynthoh halor ka jingwan phai biang jong u Bah L.G.Nongsiej sha ka party. Hynrei kitei ki jingkynthoh ki dei tang ki jingkynthoh jong kito ki briew ki ba kwah ban pynthohbria ïa ka party.
U Bah Lostar Lyngkhoi haba kren, u la ong ba naduh ba u dang samla u la long uwei na ki nongïalam ba hakhmat jong ka Conggress. Hynrei ha kane ka kynti u la wan ban kyrshan noh ïa u Bah L.G.Nongsiej na ka HSPDP. Utei u rangbah u la ong ruh ba ka jingmih noh jong u na ka Congress ka dei namar ba ki policy treikam jong katei ka party kim ïahap satia bad ki paidbah ka jylla.
Kiwei pat ki rangbah kiba la ai jingkren ki la ong ba ki matti ki ba u (L) Bah Hopingstone Lyngdoh u la iehnoh ha ka party ki long ki mawjam kiba kordor tam jong ka jaidbynriew namar naduh ba u la seng ïa ka HSPDP haduh ba un da khlad na kane ka pyrthei um shym pat kylla ktien ne shet kylla ïa ki paidbah. Khatduh eh kitei ki rangbah ki la ong ba haduh kine ki sngi ka HSPDP ka dang ïeng skhem halor ka nongrim ban ïada ïa ka hok longtrai jong ki paidbah la ka long ha ka khyndew ka shyiap, ka riti ka dustur bad ka jinglong kyrpang jong ka jaidbynriew ha baroh ki liang.