Press "Enter" to skip to content

Ka RO ka la pynshai, ka dei tang ka buit elekshon: Bah Teibor

Shillong, Rymphang, 10: U kyrtong shimet na Mawlai Constituency, u Bah Teiborlang Pathaw u la ong ba ka jingpynmih khubor pyrshah ïa u ka dei beit tang ka buit elekshon namar bym ïoh daw eiei, haba pynshai halor ka jingpynmih khubor na ka liang jong u kyrtong ka Congress Bah Marbud Dkhar, uba la khyllie ha ka por ba dang shong bishar ïa ki kot thep kyrteng (scrutiny) ha ka sngi thohdieng hakhmat ka Returning Officer ka Mawlai Constituency.
Haba pynshai ïa ka jingmih khubor ba u la jan duh ïaleh elekshon namarba u la shah mudui ha ka liang jong u kyrtong ka Congress ha ka por ba leh scrutiny, u la ong, “ka dei kaba khlem nongrim namarba katkum ka Affidavit jong ka District Concil ka la thoh ba uno uno u kyrtong u hap ban batai lada don kano
kano ka Case ba la rai pynrem da kano kano ka Iingbishar hapoh ka ri India. Haba ïa nga kam don kum kata, balei kin shu mudui. Wat na ka liang ka Returning Officer ka la pan na ki (liang u kyrtong Congress) ïa kata ka Hukum na ka Court kaba ki pynmih, hynrei kim shym la lah ban ai, bad ka jingpyrshang jong ki ban wohnia la pynkut noh da ka Returning Officer, namar kam don kano kano nongrim ”
U la ong ruh ba ka jingwohnia na ka liang u Kyrtong ka Congress ka dei tang da ka ktien ym da ka jingthoh hakhmat ka Returning Officer ha katei ka sngi ba bishar ïa ki kot thep kyrteng.
“Ka long kaei kaei kaba i thamula ïa ka jingleh jong ki (liang u Kyrtong Congress) namarba kim shym la lah ban wanrah ïa ka jingshisha, bad ka Returning Officer ruh ka khlem treh ban kohnguh ïa kaei kaba ki leh,” la ong une u kyrtong shimet na Mawlai.
“Wat ka Returning Officer ruh ka ong ba lada don kano kano ka Case ba ladep shah rai pynrem phi dei ban pynpaw hynrei haba kam pat don eiei kumno ngin batai ma ngi ïa kata. Katkum ka Profoma ka khlem kren eiei ïa kata. Ka Returning Officer ka shu kylli ïa ki (liang u kyrtong Congress) hato phi don ïa kata ka Hukum ba la rai pynrem ïa nga halor ka Affidavit, ki shu sngap bad ki ruh ki la kubur ba ym don kano kano ka hukum na ka Ïngbishar,” u la ïathuh shuh shuh.
“Namarba kim (liang jong u kyrtong Congress) shym la lah ban sei ïa kano kano ka Rai kaba pynmih na kano kano ka Iingbishar, ka Returning Officer ka la kren shai ba ym don ei ei ka jingwit, bad ka kam ka la kut namarba ladep ban bishar,” la ong u Bah Teibor.
U la kynthoh ruh ba kane ka dei tang ka buit ban ïoh daw ha kane ka elekshon MDC namarba kane ka khubor ka la mih hajan ka sngi ïaid paidbah jong u kyrtong ka Congress.
“Nga ladep ujor pyrshah halor ka jingpynmih khubor namarba ka ktah mationg ïa nga shimet,” u la ong.
U Bah Teibor ula ong ruh ba u shahniah beit ha ki paidbah ka shnong Mawlai ban rai namarba ki paidbah ki tip bha ba ka jingshah ujor ha ka Central Bureau of Investigation (CBI) lem bad arngut ki heh Ophisar ka NEIGRIHMS halor ka jingkynnoh ba ki ïasuhbuit ban lehthok ha ka jingsiew ïa ka Employees Provident Fund ka dei na ki briew kiba nabar ka jylla kiba bishni bad pihuiñ ïa ka jingïohlad jong u ban shimti ïa ki kam ha katei ka Hospital bad ban aikam kylla pat sha ki samla na kylleng ki shnong bapher bapher jong ka Mawlai bad kiwei kiwei ki shnong.
Ha kaba ïadei bad kane, u nongthoh khubor haba pyrshang ban ïakren bad ka Returning Officer lyngba ka Telephone ka la kyntait ban ïathuh eiei halor ka jingjia ha katei ka sngi namarba ym shym la aibor eiei ïa ka ban kren sha ki nongthoh khubor bad bthah ruh ban kren sha ki bor kiba kham halor. Ka la ong ruh ba ym dei ma ka kaba kren sha ki lad pathai khubor bad kam don satia kano kano kaba ong ba la jan duh ïaleh elekshon uno uno u kyrtong ba la wan ban thep kyrteng.