Press "Enter" to skip to content

La palat ka jingjaboh bad khapngiah ha ka nongbah

Ka Nongbah Shillong imat katba nang ïaid ka por ka la nang duh pynban ïa ka nam ba ka ju don mynshwa kum kata ka ‘Scotland of the East” tang na ka daw ka jingjaboh kaba la paw shai wat ha ki jaka paidbah ruh. Ka jing bun ki briew ba nabar jylla kiba shu wan buhai shnong ha kiba bun ki dong khamtam ha kito ki jaka ba khleh jaidbynriew ka la pynlong ïa ka nongbah Shillong ba kan shah kjap noh ïa ka jong itynnad jong ka katba nangmih ki sngi.
Ka long kaba sngewtynnad shibun ba kum ka jaidbynriew Khasi kaba im hapoh ka nongbah jong ka jylla, ngi don ïa kata ka mynsiem ka jingsngewsynei bad ka jingïai shah, hynrei ka jingailad ïa kiei kiei ki bymdei ka wanrah pynban ïa ka jingma bad ka jingkynrum kynram ha kiba bun ki liang. Ka jingroi jong kum kitei ki poi-ei hapoh ka nongbah ka la pynjyrsieh shisha ïa ka nongbah ha kiba bun ki bynta namar ym tang ba ki ïoh ban seng kam seng jam ha ki rud lynti ne ïaid sawdong ka nongbah ka don ruh ka jingsyier ïa ka ïaid ka ieng jong ki ha ka por mynmiet ruh. Katkum ba ka long hi ka mynsiem sngewsynei kam lah ban ïarap na ka bynta kitei ki jait briew namar katta katba ki nangïohlad katta ki nang tur bad la poi haduh u pud ba ki la kylla long ki shiah ha ka imlang sahlang.
Kaba kham i saitmet ka long ba ka jingbym don ka jingtalasi ne ka jingkhynra ïa ka tynrai jong kitei ki bar jylla ba die madan ka la pynlong bad buh jingeh haduh katta katta ban ïaid lyngba ka Khyndailad ha ka por janmiet tang namar ka jingnang roi ki dukan rit dukan ria kiba ieng hapdeng surok bad ki rud surok baroh arliang.
Ki jaka paidbah khamtam kum ka Khyndailad, Iewduh, Motphran, Polo, Laitumkhrah, Laban ki la long ki kabu ïa kum kine ki jaid briew ban ïoh ban phriang bad ban ïaid ban ieng ban leh ïa ki kam kiba i saitment naduh ki kam kiba sniew haduh ki kam kiba shyrkhei. Dei kitei ki briew kiba la pynsaphriang ïa ki kam shong bad die madan bad pynkhapngiah ïa ka imlang sahlang. Na kine ki mih ki kam tuh bad ki kam kloh pla kiba pynsyier khamtam lei ha ki kynthei bad ki longkmie khamgtam lei ha ki thaiñ iewduh bad Khyndailad
Katei ka jia kumjuh wat ha ki thaiñ Iewduh, Iew Mawlong ruh ha kaba ki paidbah khlem jingsngew ki shu bret pathar ïa ki jaboh jabaiñ ha lynti syngkien bad wat ha ki jaka ieng kali ruh. Ym lah ban kynnoh tang ïa ki nongleit nongwan hynrei wat ki nongshong dukan ruh ki noh synñiang lang ha kaban pynjaboh ïa ka ïew ka hat bad ki lynti syngkien ban leit sha ki basa bapher bapher kiba don hangtei.
Lada ka Sorkar ka pyntreikam hok ïa ka kam die madan kan ïarap shisha bad ka lah ban pynïoh pat ïa kata ka bynta jong ka burom ba la jah jong kane ka nongbah kaba la tip kum ka Scothland of the East. Ka aiñ barabor ka long ban teh lakam ïa ki jinglong ba lyngkar bad ban wanrah pat ïa ka jingïaid beit ïaid ryngtih ha ka imlang sahlang.
Kumta ka jingtehlakam ïa ki riew shang makia da ka kyndon aiñ kan ïarap ban khanglad ïa ki ba kin ym shlan ban tur kulmar. Wat la ki dei ki briew ki bym don shuh ka jingsngew briew, hynrei lada ka don ka aiñ kaba pyrkhing ki tip ba kim lah ban tur palat ïa u pud.
Kumjuh ruh ka jingthmu jong ka sorkar ban khanglad ïa ka jingdie madan pathar kan long kawei pat na ka jingpynkhuid bad kyntiew ïa ki kam jngoh kai pyrthei ha kane ka thaiñ. Ka jingkhuid kumba ngi tip ka khring ïa ki nongleit nongwan kiba na kiwei pat ki thaiñ jong ka ri bad ruh ka pyrthei. Kumta ka sorkar ka donkam ban ïoh ïa ka jingïatreilang jongki paidbah ha kaba pynneh ïa kata ka nam jong ka jingkhuid kaba la ju tip kum ka Scotland of the East.
Haduh kine ki sngi la ïohi ba katei ka aiñ kam pat da trei kam than ha kiba bun ki bynta jong ka nongbah, hynrei la khmih lynti ba ka sorkar kan shim khia ïa kane. Lym kumta ki pateng ban wan kin ong hangno kata ka Scotland of the East?