Press "Enter" to skip to content

Lynñiar ki pulit 3rd Battalion Delhi bym ju ïoh tulop tikna man u bnai

Shillong, Rymphang 10 : Ki pulit 3rd Battalion ka Jylla kiba don mynta ha nongbah Delhi ki la kynnoh ba mynta ki poi ha ka khim khait namar ba ki bor ba dei peit kim ju ai tikna ïa ka tulop man u bnai.
Kitei ki pulit bym kwah pynpaw kyrteng ki la ong ruh ba nalor ba ki hap bud pyrkhing ïa ka kamram ba la bynshet hynrei ym don pat ba ñiew briew ne pyrkhat lem ban pyllait ne siew ïa ka tulop ha ka por kaba biang khnang ba kin lah pat ban phah sha ki khun ki kti ne sha ki bahaïing hasem kiba ki hap ban kyrshan.
La pynpaw ruh ba watla ki ïoh ïa ka bam ka dih kaba biang ïalade hynrei ka jingbym ïoh tulop tikna ka pyndiaw haduh katta katta ïa ki. Ki la ïathuh ruh ba don ki khep ba shimpor
haduh ar bnai ban ïoh tulop.
Ki la ïathuh ruh ba watla ki leit ban kyrpad ïa ki bahalor ym don satïa kiban pynsngap ne pynsngew halor kitei ki jingud jingnam bad ki jingeh ba kum ki bor pahara ki kynduh. Ka la mih ruh ka jingkynnoh ba na ka liang kiba peit ïa ka tnad Account ki shim sting haduh katta katta ban pynbiang ïa ka jingkheiñ jingdiah kaba lah ban long ka dawbah ba ka shimpor slem bha ïa ki ban ïoh tulop.
Kumta, ki la kyrpad jur ïa ki bor sorkar khamtam ïa ka tnad ba dei peit ba kan shimkhia lang halor katei ka jingeh ba ki kynduh khnang ba nangtei shakhmat kin ïoh tikna noh ïa ka tulop man la u bnai.