Press "Enter" to skip to content

Tang ka jingaiei ka wanrah ïa ka jingkyrmen

weekly column
“Ki Symboh ka jingim”

Ki dkhot Bible mynta ka sngi.
“ …. U Trai u la pynsleh ïa nga ban ïalap ïa kiei kiei kiba bha ha kiba jemnud; u la phah ïa nga ban spaiñ ïa kiba la pait dohnud, ban ïalap ïa ka jingpyllait noh ha kiba la ring mraw, bad ïa kaba plie ïa ka byndi ha kiba la khum…..ban ai ha ki kaba sien syntiew ha ka jaka ki dpei, ka umphniang ka jingkyrmen ha ka jaka ka jingsngewsih, ka jaiñkup ka jingïaroh ha ka jaka ka mynsiem kaba khia….” Issïah 61:1,3
U Joseph Prince, uwei na ki nongïalap ba la thoh shibun ki kot bad ruh ieit ban ïalap bha ïa ka jingaiei, u la ong ba ha ki palat arphew snem jong ka jingshakri ïa ka ktien U Blei, u la shem ba dei tang ka jingïalap ïa ka nongrim jong jingaiei jong U Blei kaba wanrah jingkyrmen sha ki bangeit. Dei tang kaei kaba u Jisu u la pyndep halor ka diengphna kaba lah ban wanrah ïa ka jingpynthymmai, shalom-jingsuk, bad jinglaitluit na baroh ki jingpynrem bad ki jingpang ka mynsiem kiba la jia ha ka jingim. Shah ba ngan ïasam bad phi ïa ka khubor jingïaroh kaba la ïoh pdiang na ka Alena, kaba na New Zealand. Shah shkor bha ba kumno u Blei u la sop spaiñ ïa ka jingpait dohnud jong ka ( Issiah 61:1):-
Ka Aena ka la thoh kumne, Pastor Prince, nga la heh la san ha ka longïing ban ïasah lang bad u kpa uba lehbeiñ bha bad lyngba kane ka jinglong jong u la pynbor ïa ka longïing ban poi haduh u pud ka jingpait jingpra. Haba la lynshop ïa ka jingkoit jingkhiah jong u lyngba ki jingpang kiba bun jait, U Blei u la buh ha ka dohnud jong nga ïa ka jingdonkam jingïarap jong ki kmie/kpa jong nga. Nga la kylli na U Blei, “balei da nga? ngam ju lah shah ïa ka jinglong jong i pa!” Ha kaba kut, nga la ong ha U Blei ba wat lada ngam kwah ban leh ïa kata ka kam ban ïarap, ngan leh ïa ka na ka bynta ka burom U Blei.
Kane ka jingïarap jong nga ïa ki kmie/kpa jong nga ka la neh da bun bun snem, bad nga la ïai shah shitom shisha ban ïarap ïa i pa jong nga. Nga la leh ïa kata da la la dohnud baroh, ban duwai na ka bynta jong i bad ruh ban synran lem ïa i ha baroh ki por kiba i long marwei. Hynrei wat la katta ruh kat haduh ka khyllipmat ba in khlad noh na kane ka pyrthei, kaei kaba nga la ïoh pdiang na i ka long beit ka jingkyntait. Man ka por ba nga leit sha jan jong i, in phai wak ïa la ka khmat sha lyndet. Im ju kylla jemnud, wat ha ki por kiba nga kloi ban panmap na i na ka bynta kino kino ki jingleh jong nga kiba pynsngew mong ïa i, tdot wat haduh ka jingthiah ïap jong i ruh.
Phi lah ban mutdur haduh katno ka jingpait dohnud kata ka lah ban long. Ha ka por ka jingpynkhreh ïa ka jingleit ban ontep ïa i, nga la kyndit bad sngewsih haduh katta katta, kat haduh ba ngam lah shuh ban pyrkhat ïa kaba dei. Nga la pait dohnud shisha. Nga la shem jynjar shibun eh wat ban ring mynsiem na kaei kaba la jïa jong kata ka jingsngew pynrem ha ka dohnud jong nga.
Hynrei nga la ïoh ban pule ïa kawei ka kot jong phi bad kane ka la wanrah ïa ka jingsting bad jingkhiah na kata ka jingkhïa ka jingim na baroh kita ki jingsngew pop bad jingpynrem kiba la ïoh seng skum hapoh jong nga. Kata ka jingsngewsting ka la long kaba donbor haduh katta katta kat haduh ba nga la rynsied da ka jingkmen, ïam da ka jingkmen ka dohnud da ki bun bun sngi, bad mad ïa ka jingsuk U Blei ha ka dohnud bad ha ka jingim jongnga. Nga sngew laitluid! laitluid na kata ka jingkhïa jong kata ka nongrim jong ka jingpynrem, jingkyntait bad jingteh mraw. Kata ka jingkhia ka la hap noh na nga bad ka long kaba phylla. Kata ka dohnud jong nga kaba shisien ka long kaba dap da ka jingpang mynta ka la sting kdar bad mad ïa ka jingsuk.
Khublei shibun Trai Jisu, na bynta kaei kaba Me la pyndep halor ka diengphna! La pyllaitluid ïa nga na ka Jingpynrem ! Man la ka sngi, nga phla sha ka longïing jong nga bad sha lade ba la kynkhu shi katdei eh ïa nga, la lehsbun eh ïa nga, bad la ieit jylliew eh ïa nga ! Hallelujah !
Phi baroh phi lah lehse ban sngewthuh bha ïa kata ka jingshah pynrem kiba ka Alena ka la mad ha kitei ki bynta jong ka jingim jong ka. Lehse kum kine ki juh ki jingpynrem ki khum mraw ïaphi bad ïai ïaleh ban set ïa ka jinglaitluid jong phi wat ban ring pynhiar mynsiem, na kiei kiei ki jingjïa kiba la jia ha ka jingim jong phi. Paralok baieit, U Blei ha ka jingieit bad ka jingaiei jong u u kwah ban pyllaitluid ïaphi mynta ka sngi. Kaei kiba phi donkam ban tip ka long ba ym don u pud haduh katno la dawa naphi ban pynsngewbha ïa U Blei da ki jingleh jongphi khnang ba kan lah ban wanrah pat ïa ka jingpynlong thymmai kaba dei kata ka jingpynkhïah kaba phi donkam eh na ka bynta jongphi. Hynrei ha baroh kata kaba phim ju lah ban leh bad phim lah hi ruh, U Jisu u la pyndep lut ïa kata baroh na ka bynta jongphi bad u la sieiw ïa ka dor jong ka pop jong phi halor jong ka diengphna.
Mynta ka sngi, ka karmam jong phi ka long ban ngeit ha u Nongpynim jong phi bad pdiang ïa ka jingkynrei jong ka jingaiei jong u bad ïa ka jingaiei jong ka hok. Kata ka long kumno phin mad ïa ka jingpynkhiah bad ka jingsop spaiñ ïa ka dohnud ba la pait la pra jong phi, ka jingpynthymmai ka jingpyrkhat jong phi bad ka jingkhlaiñ bad ka jingjop jong u kan ïoh jaka ha baroh ki bynta jong ka jingim jong phi kiba baroh shi katta ki shah jop bad sah dum. Ka la dei ka por ban jam sha ka jingim jong ka jingjahthait ha u Khrist Jisu bad kaei kaba u la pyndep halor ka diengphna bad shu peit beit ïa ka jingjop kaba un pynïoh ïa ka jingim jong phi kaba phi donkam eh.

KA JINGPUSON MYNTA KA SNGI
Ka la dei ka por ïa nga ban shongthait na ka jingpyrshang da ka jinglah la jong bad shu shaniah beit ha kaei kaba u Jisu u la pyndep halor ka diengphnna !