Press "Enter" to skip to content

Tohkit biang ka CBI ïa u Heh Pulit ka West Bengal

Shillong, Rymphang 10: Ka Central Bureau of Investigation (CBI) kala tohkit biang hynne -kaba dei ka sngi ba-ar ban tohkit ïa u Police Commissioner ka Kolkata u Rajeev Kumar, haba ïadei bad ka jyrsieh Saradha Chit Fund.
Ka CBI kan sa tohkit ruh sa ïa u MP barim ka Trinamool Congress u Kunal Ghosh uba la shah khot hajir lang sha ka Ophis jong ka CBI ha Oakland bad ïa u la tohkit halor ka jingdon bynta ha ka jyrsieh Rose Valley bad Saradha.
U Ghosh uba la shah kem ha u Naiwieng 2013, ula ïoh ïa ka bah jamin ba shipor na ak Calcutta High Court ha u snem 2016. U Ghosh ula poi ha Ophis ka CBI ha ka por 10 baje mynstep kaba long shiteng kynta hashuwa jong u Rajeev Kumar.
Hynnin ka sngi ka CBI kala tohkit haduh phra kynta ïa u Rajeev Kumar namar ka jingdonkti ban pynjulor ïa ki sakhi satat jong kane ka kam jyrsieh. Ïa une u Heh Pulit la synran da laingut ki Heh Pulit ka Kolkata ba kynthup ïa u Additional Police Commissioner Javed Shamim, Khliehduh ka STF Murulidhar Sharma bad u Khliehduh ka CID Praveen Kumar Tripathi. U Nongïasaid Aiñ jong u Rajeev Kumar u Biswajit Deb ula ïathuh ha ki lad pathai khubor hynnin ka miet ba u Rajeev Kumar ula ai ka jingiatreilang bad ka CBI ha ka jingshah tohkit.
Na ka liang ki Pulit ka Jylla kila pynkhlaiñ bha ïa ka bor pahara ïa u Rajeev Kumar bad kumjuh ruh ïa ka Ophis jong ka CBI kaba la shlei da ki Pulit Special Force-10 (SF-10).