Press "Enter" to skip to content

Tuid ki jingkyrshan sha ka M:19SSO ban kyrshan tylli ïa u Bah Teibor

Shillong, Rymphang, 10: Ka kynhun kaba kyrshan ïa u kyrtong shimet na Mawlai Konstitwensi, u Bah Teiborlang Pathaw, ka Mawlai:2019 Social Service Organisation (M:19SSO) ka la nang ïoh shuh shuh ka jingkyrshan ha kaba da ki spah ngut ki nongïalam na baroh ki Unit ka People’s Democratic Front (PDF) Mawlai Pyllun, ki la wan pynïasoh ban ai jingkyrshan ïa une u rangbah ha Kane is ilekshon MDC la ban sa long ha ka 27 tarik u bnai Kyllalyngkot, mynta u snem.
Katkum u kyrwoh ba la phah da ka M:19SSO ha ka sngi U Blei, la ong ba ha ka jingïalang kaba heh bad kham shongshit kaba la long ha Mawlai Mawïong ha ka 7 tarik mynta u bnai Rymphang, baroh ki nongïalam na ki Unit bapher bapher ka PDF Mawlai Pyllun ki la rai ym tang ban ai jingkyrshan ïa u Bah Teibor, hynrei ki la pynïasoh syndon bad ka kynhun M:19 SSO bad rai ban trei shitom ban pynjop donburom ïa une u rangbah uba la mih ban ïakhun ha kane ka ilekshon MDC na Mawlai.
Ha kane kajuh ka sngi, ha kawei pat ka jingïalang ha Mawlai Ïewrynghep, da ki spah ngut ki nongshong shnong bad nongkyrshan na kiwei pat ki seng saiñ hima ki la wan ban pynïasoh sha ka M:19SSO ban ai jingkyrshan tylli ïa u Bah Teibor.
Ym tang katta, ka M:19SSO ka la ong ba ha kane ka sngi 7 tarik Rymphang, la wan pynïasoh ruh da baroh ki nongkitkam ka PDF Kyntonmasar Unit sha ka M:19SSO ban kyrshan borbah ïa u Bah Teibor.
Ha ka 6 tarik pat, ka M:19SSO ka la pynlong ïa ka jingïalang ïing (house meeting) ha Mawlai Nongpdeng ha kaba la sakhi ïa ka jingshimbynta shit rhem ki paidbah ban ai ka jingkyrshan ïa u Bah Teibor.
La ïoh ruh ka jingkren na ki nongïalam ka M:19 SSO kynthup u Bah Samuel Biam uba la kren ïa ka nongrim jong ka jingïaid lynti jong u, bad ïa ka rai ba ki paidbah kiba ju don ryngkat bad u, ki la shim na ka bynta ban don ryngkat bad u Bah Teibor ha kane ka ilekshon MDC.
Ka M:19SSO ka la ong ba ha kane ka jingïalang, bun kiba wan sha ka jingïalang kim lah khlem da jaw ummat haba ki ïohsngew ïa ka jingkren jong Bah Biam.