Press "Enter" to skip to content

Ïaid shaid shaid ka jingpynbha ïa ka PMGSY Langja – Mawthawkrah

Nongstoiñ, Rymphang 11: Ka jingpynbha bad siang rong ïa ka surok kaba la pyntrei lyngba ka Pradhan Mantri Gramsadak Yojana (PMGSY) kaba 8 kilomitar na Langja haduh Mawthawkrah kba la sdang naduh u bnai Naiwieng jong u snem ba la dep kaba la pyntrei da u Bah Khringwel Lyngkhoi ka la ïaid shaid shaid haduh kine ki sngi. Naduh ba utei u Kontraktor u la shimti ban pyntrei ïa katei ka surok ki paitbah nongshong shnong jong kiba bun ki shnong na katei ka thaiñ ki la kmen namar ba ka jing pyntrei ka long kaba sted bha.
Ki nongïalam ka Synjuk ki Rangbah Shnong ka thaiñ Muliang ba kynthup ïa u Bah B.Nonglang Bah S.Mawlieh bad kiwei kiwei haba ïakren bad u nongthohkhubor mynta ka sngi ki la ong ban a ka liang ka synjuk kam lah khlem da ai khublei ïa utei u Kontraktor bad ruh ïa u MLA barim ka thaiñ u Bah K.P.Pangñiang uba la trei shitom ha ka por ba u dang long kum u MLA ha kaba u la leit da lade haduh Delhi ban pynbiang ïa ki kot ki sla na ka bynta ban pynïoh jingïarap na ka skhim jong u Myntri Rangbah ka Ri kaba la tip kum ka PMGSY skhim na ka bynta ban shna surok hapoh ka Constituency jong u bad ka jing trei shitom jong u ka la urlong.Ki la ong ruh ba ha ki snem ba la leit noh ki paitbah katei ka thaiñ ki la mad ïa ka jingeh kaba khraw bha ha ka leit ka wan ,ka kit ka bah khamtam eh ha kaba kit ïa kiba pang ba shitom ban leit phah sumar namar ka jing sniew palat jong katei ka surok.Ki la pynkynmaw ruh ba ïa katei ka surok P<GSY kaba phra kilomitar la dep shna naduh u snem 2001-02 bad la shu siang maw malu mala bad tang hadien shi snem katei ka surok ka la jot rathai haduh ba wat ki trok ruh ki la shitom ban ïaid ha ka por lyiur.Kitei ki rangbah ki la ong ruh ba ka jingpynbha bad siangrong ïa katei ka surok kan long ka jingkyrkhu ïa ki paitbah ka thaiñ nagne shakhmat.
Nalor katei ka surok kitei ki rangbah ki la ïathuh ruh ba ha ki snem ba la dep na ka liang ka ophis jong ka Meghalaya Energy Corporation Limited (MECL) ka la phah jurip na ka bynta ban pynpoi bording ha kiba bun tylli ki shnong kiba don ha ki jaka ïakajia pud bad ka Assam kum ha Mawsikar,Umbyrsit,Umwali Umyiap.Mawdiangsnam bad kiwei kiwei ki shnong ha katei ka thaiñ. Ki la ïathuh ruh ba wat la katei ka jingthmu jong ka MECL ban pynpoi bording ka la pyn kmen ïa ki paitbah ruh na ka daw jong ka jingpyndik jong ka sorkar Assam ka ophis MECL ka la shem jingeh ban pyndep ïa katei ka jingthmu.Kumta namar ka jing dawa jong ki paitbah utei u MLA/MDC barim ka thaiñ u la shimkhia bad trei shitom haduh kattta katta bad hakine ki sngi ka jingpynpoi ïa ki sainar eletrik ka la poi haduh shnong Mawsikar bad sa tang kumba katto katne bnai yn pyn poi haduh Umbyrsit,Umwali Umyiap haduh Mawdiangsnam.Kum ban pynkynmaw ba ha u snem ba la dep ïa ka lain ban pynpoi bording sha Mawdiangsnam bad Umyiap la dep jurip ban bteng na Langpih hynrei la khang lad bad pynsangeh noh da ki pulit Assam kumta ka la shu sah kut bad mynta pat yn sdang ban pynïaid noh da ka lain klaba thymmai na Mawsikar shaduh kitei ki wei pat ki shnong..