Press "Enter" to skip to content

Kop u heh Congress ban jop bun ka INC ha ka Elekshon MDC sha KHADC

Shillong, Rymphang 12: U Nongïalam ka Congress uba dei u Chief Whip ka Liang Pyrshah, Bah Process T Sawkmie, ula kop ba ka Congress Party kan sa jop bun eh ha ka elekshon MDC ban wan jong ka Khasi Hills Autonomous District Council (KHADC) bad kan sa ïoh thaw ruh ïa ka Executive Committee (EC) ba thymmai.
“Nga thikna ba ka Congress Party kan jop bun eh ha ka elekshon MDC-2019 sha KHADC bad khlem pep ka Party kan sa ïoh thaw ïa ka Executive Committee ba thymmai ha kane ka Council” ong une u MLA/MDC ka Mawlai Constituency.
Ka Congress Party kala pynieng kyrtong na baroh 29 tylli ki Constituency jong ka KHADC bud sa ka UDP kaba la pynieng 27 ngut ki kyrtong, ka HSPDP-13, bud sa kiwei kiwei.
U Bah Process uba dei ruh u Vice President ka MPCC-Shillong City, ula ong ba ki kyrtong
jong ka Party ki dei kiba don hakhmat eh ha ka jingïakhun hajan baroh ki Constituency na ki 4 tylli ki District ka Ri-lum Khasi bad la khmih lynti ba ha kane ka kynti, ka Party kan nang jop bun ki MDC haba ianujor bad ka elekshon MDC-2014.
Lah ban kdew ba ha ka elekshon MDC-2014, ka Congress kala ïohkhur bun eh ka jingjop ha KHADC bad kane ka Party kala ïoh haduh 11 ngut ki MDC haba ianujor bad kiwei kaba long-HSPDP-7, UDP-6, KHNAM-4 bad kiwei kiwei.
Kat kum ka jingong jong u, ki paidbah ki phaikhmat bha mynta sha ka seng Congress khamtam namar ka jingïohi ba dei tang kane ka Party kaba la pyni da ki kam ban pyrshah ïa ka Citizenship (Amendment) Bill 2016 jong ka Sorkar BJP la ka dei naduh na Delhi ne ha Jylla ruh kumjuh.
Une u MLA/MDC ka Mawlai ula ongba ki paidbah ka Ri-lum Khasi bad Jaiñtia ki dei kiba stad bad kiba shemphang bha bad ki tip shai kdar ba dei tang ka Congress kaba lah ban ïakhun pyrshah ïa ka Bharatiya Janata Party (BJP), kaba la thombor bad leh beiñ na ka por sha ka por ïa ki jaidbynriew rit paid.
“Kum u Nongmihkhmat bad Nongïalam, nga kyntu ïa ki paidbah jong ki Constituency bapher bapher ba kin kylla thiah kylla dem haba buh jingkynmaw ruh ban puson bha ïa ka lawei jong ka Jaidbynrew haba jied ïa ki Nongmihkhmat ba thymmai sha ki District Council, kiba dei ki stieh iada jong ka Jaidbynriew” ong u Bah Process.