Press "Enter" to skip to content

Kular sa ka Samajwadi Party ha ka NESO ban pyrshah ïa ka CAB ha Rajya Sabha

Shillong, Rymphang 12: Hadien ka JD (U), Shiv Sena bad ka Congress, mynta sa ka Samajwadi Party kala ai ka jingkular hakhmat ka North East Students Organisation (NESO) ba kan ieng pyrshah ïa ka Citizenship (Amendment) Bill, ha Ïing dorbar Rajya Sabha.
Kane ka jingkular jong ka Samajwadi Party kala mih na u Nongïalam bad MP ka Rajya Sabha u Javed Ali Khan, ha ka jingïakyn duh bad ka NESO hynne ka sngi nyngkong ha Nongbah New Delhi, kaba la leit pan jingkyrshan na ki seng saiñ pyrthei bapher bapher ka Ri ban ieng pyrshah ïa ka CAB.
Ha kane ka jingïakynhun, ka NESO kala pyntip ba une u MP ka SP ula ai ka jingkular baka Party jongu, kan vote pyrshah ïa ka CAB lada ka Sorkar NDA ka wanrah hapoh ka Ïingdorbar Rajya Sabha.
Lah ban kdew hangne ba u Javed Ali Khan u dei uwei na ki Dkhot jong ka Joint Parliamentary Committee (JPC), kaba la thaw ban shong bishar ïa kane ka Bill kaba pynmih ïaka kynrum kynram.
Ki Nongïalam ka NESO ki pyntip ba kin sa leit ïakynduh ruh ïa ki Dkhot jong ka Bahujan Samaj Party (BSP) mynta ka janmiet haba kyrmen skhem ba kane ka Party ruh kan ai ka jingkyrshan ïa ka jingïakhih jong ka NESO. Ka kynhun ka la ïakynduh ruh ïa u MP ka Bodoland Peoples Front, u Biswajit Daimari, uba kular ban pyrshah ïa ka CAB ha Rajya Sabha.
Kumba long mynta ka BJP ka khmih lynti ïa ka jingkyrshan jong ka Samajwadi Party (SP) bad ka Bahujan Samaj Party (BSP) ban lah pynïoh ïa ka jingmynjur ïa ka CAB ha Rajya Sabha wat hapdeng ka jingïakhih kaba jur ha ka thaiñ Shatei Lam Mihngi ka Ri.
Na ka liang ki Nongïalam ka NESO kila hiar manla ka por sha Nongbah Delhi ban leit pan ïa ka jingkyrshan na ki seng saiñ pyrthei bapher bapher ka Ri ba kin ieng pyrshah ïa ka CAB. Haduh mynta ki dang dep ïakynduh ïa ka JD(U), SP, Shiv Sena bad u Rahul Gandhi, Presdent ka Congress.