Press "Enter" to skip to content

Kwah ki Hindu ban kheiñ ritpaid ha NE, pan jingshai ka SC na ka NCM

New Delhi, Rymphang 11: Ka Ïingkashari Supreme Court hynne ka sngi nyngkong, kala bthah ïa ka National Commission for Minorities (NCM) ba kan ai ka jingbatai kaba bniah ïa ka jingmut ‘Rit paid’ da kaba pynshong nongrim kat kum ka jingdon paid jong ki jiadbynriew bapher bapher ha ki Jylla.
Ka Ïingkashari kaba la khlieh da u Chief Justice Ranjan Gagoi, kala pynmih ïa kane ka hukum haba shim bishar ïa ka mukotduma jong uwei u Nongïalam ka Bharatiya Janata Party (BJP) bad u Nongïasaid Aiñ u Ashwini Upadhyay, uba kyrpad ïa ka Ïingkashari ba donkam ban batai thymmai biang ïa ka jingmut “Ritpaid’ da kaba pynshong nongrim kat kum ka jingdon paid jong ki Jaidbynriew ha ki Jylla ym da ka jingdon paid ha ka Ri baroh kawei.
Kat kum ka mudui, une u Nongïalam ka BJP, u kwah ba ka Kashari kan ai noh ka jingithuh ïa ki paid
Hindu ha ki Jylla ka thaiñ Shatei Lam Mihngi ka Ri bad kawei ka Jylla ha ka Ri kum ki ‘ritpaid’. Une u Nongïalam ka BJP ula ong ba ki Hindu ki lah ban heh paid eh hapoh ka Ri hynrei ha ki Jylla ka thaiñ Shatei Lam Mihngi bad ka Jammu & Kashmir ki dei kiba dang ritpaid.
Une u Heh BJP ula ong ba ki paid Hindu ha kine ki Jylla kila shah pynduh ïa ka hok ba ju ïoh da ki rit paid ha kine ki Jylla. Kat kum ka mudui, ula ong ba ka National Commission for Minorities ka dei ban pyrkhat thymmaiia ka rukom batai ïa ka jingmut “ritpaid’.
Ka Kashari hynne ka sngi kala pynmih ïa ka hukum ba bthah ïa ka National Commission for Minorities (NCM) ba kan shim rai hapoh ka laibnai halor kane ka mudui jong une u Nongïalam kaBJP uba dei u Nongïasaid Aiñ.
Ka Kashari kala bthah ruh ïa u Ashwini Upadhyay ba un phah biang ïa ka jingkyrpad jong u sha ka NCM ba kan ïoh shim ïa ka rai hapoh ka lai sngi ka ban sdang naduh hynne hi ka sngi.
Lah ban kdew ba ka Ïingkashari Supreme Court ha ka 10 tarik Naiwieng, 2017 kala kyntait ban pdiang ïa kane ka jingmudui jong u Ashwini Upadhyay haba bthah ïa u ban leit beit beit sha ka NCM. Kane ka mudui ba kwah kheiñ rit paid ïa ki Hindu ha ki 7 tylli ki Jylla ka thaiñ Shatei Lam Mihngi bad ka Jammu & Kashmir ka dei kaba la mih hadien ka jingshem ïa ka jingnang duna ki paid Hindu ha kine ki Jylla kat kum ka khana samari 2011.
“Kat kum ka khana samari 2011, ki Hindu ki dei kiba rit paid ha phra tylli ki Jylla- ka Lakshadweep (2.5 percent), Mizoram (2.75 percent), Nagaland (8.75 percent), Meghalaya (11.53 percent), Jammu & kashmir (28.44 percent), Arunachal Pradesh (29 percent), Manipur (31.39 percent) bad Punjab (38.40 percent)”.