Press "Enter" to skip to content

Lum ka HSPDP ïa ki kyrtong MDC, buh thong ban tam na kaba jop ha u 2014

Shillong, Rymphang 11 : Ka Hills State People’s Democratic Party (HSPDP) ha ka sngi Nyngkong ka la lum lang ban ai ka jingkyrkhu ïa baroh ki kyrtong MDC kiban aireng ha kane ka elekshon MDC kaban sa long shen ha ka 27 tarik mynta u bnai ha Khasi Hills bad Jaiñtia Hills Autonomous District Council.
Mynta ka kynti, ka HSPDP ka la sei 13 ngut ki kyrtong ban aireng ha ki constituency jong ka KHADC bad uwei pat ha constituency jong ka JHADC kata u Bah Curtis Rabon na Barato-Mukroh.
Shwa kane, u President ka party, Bah KP Pangniang u la ong ba kum ka party ki don ka jingkyrmen skhem ba kin jop khambun ki MDC khnang ba kin lah ban rah kham shajrong ïa ka lama jong ka party. “Khyndiat sngi sei hynrei ki dei ki rang bad thei kynsai kiban ïakhun na bynta ka Jaidbynriew,” la rang bad thei kynsai kiban ïakhun na bynta ka Jaidbynriew,” la ong. U Bah Pangniang uba dei ruh u kyrtong ban ïakhun na Rambrai u la pynpaw kajuh ka jingkyrmen ba un jop ha kane ka elekshon.
Ha kane ka sngi la ailad ruh ïa baroh ki kyrtong ba kin pynpaw halor ka jingpynkhreh jong ki na ka bynta katei ka elekshon MDC kaban sa long shen mynta u bnai.
Gilbert Laloo : Utei u kyrtong ba aireng na Mylliem ula pynpaw ba kum u nongïalam shnong u la tip bha ïa ki aiñ bad ki rule kiba ïadei na ka bynta ka jingdonkam ha ki shnong ki thaw. “Kum u nongïalam shnong nga kheiñkor ïa ka District Council namar dei ma ka ban ïada ïa ngi kum ka Jaidbynriew. To ngin kyntu ruh ïa ki paidbah ba kin mih ryntih ban wan thep vote khnang ba ngin lah ban pyni sha ka sorkar India ba ngi sngewthuh ïa ka jingdonbor ka District Council.”
U Bah Gilbert un hap ban ïa khun pyrshah ïa u MLA barim ka thaiñ, Bah Ronnie Lyngdoh kumjuh ïa ka MDC bad kyrtong PDF Kong Teilinia Thangkhiew.
Banri Kupar Wahlang : Utei u kyrtong na Laban – Mawprem u la ong ba mynta ka kynti u don ka jingkyrmen ban jop namar kiba bun ki paidbah ki pynpaw ba kin ïai donlang bad u kumba ki la don ha kine ki sien ïa khun ba la dep. U ong ruh ba ha ka elekshon MDC ba dang shen u la shah rem tang khyndiat eh, kata tang 107 vote, kumta u don ka jingkyrmen ba khlem artatien mynta ka kynti ki paidbah kin ai ka jingjop ba donburom.
“Nga dap da ka jingkmen ba nga ïoh ïa ka jingkyrkhu na ka party shwa ba ngan leit sha u paidbah ryngkat ka jingkyrmen ba ngin rah ïa ka jingjop,” u la ong. U Bah Banri u hap ban ïa khun pyrshah ïa u MDC ba mynta uba dei u kyrtong ka UDP, Bah Ricky Shullai.
Hilarius Warbah : Utei u kyrtong na Nongkrem u la ong ba ka jingskhem ki nongkyrsha ka party ka la ai jingkyrmen ïa u khamtam haba bun ki nongkyrshan naduh PDF, Congress, NPP bad kiwei kiwei ki wan ban ai ka jingkyrshan ïa u. “Watla ka jingïakhun kan dei kaba ïa khaid bha hynrei ngi don ka jingkyrmen,” u la ong.
Kestar Warjri : U la ong ba kum u kyrtong ban ïa khun na ka Mawphlang – Diengiei u don ka jingkyrmen ban pynkhih ïa katei ka constituency mynta ka kynti khamtam haba ka dang shu dep ban rakhe ïa ka jingdap 50 snem. “Ha u snem 1993 dei mangi ba pynduh ïa ka HSPDP hynrei mynta pat dei mangi ban pynkhie im ïa ka ryngkat ka jingkyrmen ban jop,” u la ong.
Une u rangbah un hap ban ïakhun pyrshah ïa u Bah Lamphrang Blah MDC ba mynta ka thaiñ.
Wanstep Diengdoh : Utei u kyrtong na Sohra u la ong ba kum u khun trai na ka shnong Sohra u ïohi ba kam da shem jingeh ïa u ban poi sha ka thong mynta ka kynti namar ki nongïakhun kim dei shuh ki radbah kumba u la mad ban ïa khun ha u snem 2003, kata pyrshah ïa u Myntri Rangbah barim ka Jylla (bam kwai ha dwar u Blei), Dr. FA Khonglam, nangta ïa u CEM ba rim ((bam kwai ha dwar u Blei), Bah David Lyngwi.“Kane ka jingmih kam dei na ka bynta ïanga shimet hynrei ka ri ka thngan bad kyrduh namar ka jingkhang ïa u mawshun, dewiong kaba la syngit ïa ka trei ka ktah, ka bam ka dih,” u la ong.
Nolipstar Lyngdoh : Kum u kyrtong ban ïakhun na Mawkyrwat, u la pynpaw lang kajuh ka thong bad ka jingkyrmen ba kin lah ban poi sha ka thong da ka jingtrei lang ryngkat ryngkat. “Ngin pyntreikam ïa ki ishu kiba ka party ka don,” u la ong. Ka Mawkyrwat kadei ka constituency kaba la pynjop ïa u MLA na ka HSPDP, Bah Renikton L Tongkhar bad kumta, ki buh ka thong ba u MDC ruh un dei na katei ka party.
Sherborlang L Mawlong : Utei u kyrtong na Sohiong u la pynpaw ba ka jingïakhun ka long kaba shongshit bha ha katei ka constituency. U la ong ruh ba mynta ka kynti lei lei u sngew tikna ba un jop kham bun shah na kawei kaba u Bah Samlin Malngiang u jop ha ka elekshon MLA kaba dang shu lah shen.
Kum u kyrtong uban pynskhem ïa ka kut jong u MLA, u Bah Sherbor u la ong ruh ba na ki 6 ngut ki kyrtong kiban ïa khun, ki la sngew tikna ba ka kyrdan kaba nyngkong kan leit sha ka HSPDP.
Damian Marshiangbai : Utei u rangbah uban aireng na Mawthadraishan u la ïathuh ba na ki kyrtong baroh ki sngewskhem namar ba ki ïoh ban lamkhmat na kiwei pat ki kyrtong.
Donlang Sohkhlet : Utei u kyrtong ban aireng na Umsningu la ïathuh ba dei tang ma u marwei na Ri Bhoi ban aireng na ka HSPDP. U la ïathuh ruh ba ha i por ba lyngkot u la ïoh pat ïa ka jingshaniah jong ki paidbah watla u hap ban ïa khun pyrshah ïa ki radbah bad ruh ïa ka bor jong ki heh spah. U la ïathuh ruh ba kum u kyrtong ba la dep ban aireng ha u 2013 kum u kyrtong shimet u la ïoh haduh 3,900, kata ruh tang hapoh arbnai ba u mih madan. Shuh shuh u ong ruh ba da ka jingïatrei lang ryngkat ka party un poi sha ka thong.
LG Nongsiej : U Bah Nongsiej uba dei ruh u Chairman barim ka KHADC mynta ka kynti un ïakhun biang ban pynskhem ïa ka shuki MDC na Nongstoiñ. Utei u kyrtong u laong ruh ba watla ki don bun ki kyrtong hynrei u don ka jingkyrmen kaba skhem ba da ka jingtrei lang kin ïoh ban jop biang mynta ruh.
Currentis Rabon : Utei u rangbah ban aireng ha Barato ha JHADC u la ong ba u don ka jingkyrmen ba un ïoh ban ïoh bsuh jaka ha katei ka distrik. U ong ruh ba kum u kyrtong ba la ïa khun ar sien u la long khun khatduh hynrei mynta ka kynti u ong ba u don ka jingkyrmen ba un ïoh ban bat noh ïa ka kyrdan ba nyngkong.
Haba bynrap lang ha kane ka sngi, u Bah Witting Mawsor Vice President ka party u la pynpaw ïa ka jingkmen ba na ki 14 ngut ki kyrtong, haduh 12 ngut ki la wan ban ïoh ïa ka jingkitbok bad ka jingkyrkhu na ka party shwa ba kin leit sha u paidbah. Kiba khlem lah ban poi sha katei ka jingïalang ki kynthup ïa u Bah Martle Mukhim na Mawkynrew bad i Kong Badariti Nonglait na Mawshynrut.
Na ka liang u General Secretary, Bah Renikton L Tongkhar u la ong ba kum ka party ki sngewkmen ba ki ïoh ïa ki kyrtong kiba kynsai tam. Katkum ka jingong jong u ki don bun kiba pan tiket hynrei kum ka party ki kwah ban jied bad ai tang ïa kiba don jingkyrmen ym ban shu kmen ba la ïoh ban pynieng bun ki kyrtong. “Ngi sngewkmen ba ngi ïoh sngew ba ka lyer jong ki kyrtong ka dei beit ba ki poi sha ka final,” u la ong.
Shuh shuh u ong ruh ba mynta ka kynti ki don ruh ka jingkyrmen ba kin lah ban tam 100 persen na kaei kaba ki ïoh ha ka elekshon ba la dep. Nalorkata, u ong ruh ba kum ki kyrtong ki dei ban don ka nongrim kaba shai bha ban leit sha u paidbah, kata ban kin ieng pyrshah beit la ka long ha District Council, sorkar jylla ne sorkar pdeng lada ki wanrah ïa kino kino kiba long pyrshah ïa ka riti dustur ne ïa ka jaidbynriew.
Na ka liang u Chief Organiser ka party, Bah Samlin Malngiang ba dei ruh u MLA bad Myntri ka tnad PHE u la ai lang ka jingkitbok ïa kitei ki kyrtong ba kin pynkhreh bha na ka bynta kane ka elekshon khnang ba kin ïoh kham bun ki MDC.