Press "Enter" to skip to content

Lyngba ki 2 kol na u Donlad, pynliem ka Meghalaya ïa ka Tripura

Shillong, Rymphang 11: U Donlad Lyngdoh, u la ioh ban thep haduh ar tylli ki kol ha baroh ki ar kylla jong ka jingïalehkai bad ban bynrap lang da ka shi kol na u kapten ka kynhun, Brolington Warlarpih, ka la biang pura ïa ka kynhun ïalehkai ka Meghalaya ba kan pynliem da 3-0 ïa ka Tripura, ha ka jingïakhun ba nyngkong ka lympung ïaknieh rung ki jylla ka thaiñ shatei lam mihngi sha ka Santosh Trophy, ba la long hynne ka sngi ha nongbah Aizawl, Mizoram.
U Donlad u la ioh ban thep ïa ka kol ba nyngkong ha ka minit ba 11 bad satang khyndiat minit shwa ba ka jingïalehkai kan jam sha ka jingïashong thait ba shipor, u Brolington u la ioh ban thep ïa ka kol kaba ar (42 min).
Ka jinglah ban tam lypa shakhmat da ar kol, ka la plie lad ïa ka kynhun ïalehkai ka Meghalaya ba kan tehlakam pura ïa ka jingïalehkai, kaba marsien wan ban bteng ïa ka kylla miet, u Donlad u la ioh ba un thep pat ïa ka kol kaba lai naka bynta ka kynhun ha ka minit ba 53.
Da kane ka jingjop, ka Meghalaya kan phai pat la ki jong ki khmat naka bynta ka jingïakhun kaban wan pyr-shah ïa ka Mizoram bad dei lyngba kane ka jingïakhun kaban ai ïa ka rai mano napdeng kine ki ar jylla ban long kum kawei na ki kynhun ban jam shakhmat ha kane ka kynti kaba mynta jong ka Santosh Trophy.
Ki rang ïalehkai ba la mih khmat ïa ka Meghalaya ki long Brolington Warlarpih (C), Kenio Lyngkhoi (GK), Donlad Diengdoh, Ebormi Buam, Kynsaibor Lhuid, Samuel Shadap, Ronald Lyngdoh Nonglait, Banpynkhrawnam Nongkhlaw, Arnesius Marweiñ, Raikutshisha Buam, Mediphrangki Pohlong.