Press "Enter" to skip to content

Mynta yn rah ka Sorkar NDA ïa ka CAB ha Rajya Sabha, ap ki jingïakhih ba jur ha NE

Shillong: Ka Business Advisory Committee (BAC) jong ka Rajya Sabha ka la ha ka thup ïa ka Citizenship Amednment Bill (CAB) ban ïakren ha ka sngi ba ar (12/2/201) Ka list of business, ka paw ba ïa kane ka Bill yn wanrah da u Myntri kam pohïing ka ri, u Rajnath Singh.
Kane ka jingwanrah ban mynjur ïa kane ka Bill ka long wat hapdeng ka jingpyrshah kaba jur na ki Liang Pyrshah bad khamtam na ka thaiñ shatei lammihngi ka ri India.
Ki dak ki shin ki paw na ka jingkren kiba bun ki nongïalam ka BJP, khamtam eh na u Myntri Rangbah duh, u Narendra Modi ha ka jingwan jngoh jong u ïa ka jylla Assam bad kiwei kiwei de ki jylla ka thaiñ shatei lammihngi, ha kaba u la ong ba ka CAB kan treikam beit bad ba ka sorkar kan ïa ka hok jong ki nong Assam bad kiwei pat ki rit paid kane ka thaiñ. Kane ka jingkren jong u Modi, ka kdew shai ba ka sorkar ka lah ban wanrah beit ïa kane ka Bill, namar kadei ka jingkren kaba u Modi u la kren ha ka jaka kaba jur eh ka jingpyrshah ïa kane ka Bill kan ailad ïa ki bym dei ki Muslim na Bangladesh, Pakistan bad Afghanistan ban wan sh India bad ban long ki nongshongshnong hangne.
Kumba ka paw hi, ka thaiñ shatei lammihngi kan bthei da ka jingïakhih bad kan wan ruh ka jingkylla ha ka jingïatreilang jong ki Seng Saiñpyrthei kiba don ha kane ka thaiñ. Baroh ki Sengbhalang kiba don ha kane ka thaiñ naduh ka North East Students Organisation (NESO) ka CoHSO ha Meghalaya, bad kiwei kiwei de ki kynhun ba khlaiñ bor jong kane ka thaiñ shatei lammihngi, ki la pynkhreh ban pynlong da ka jingïakhih kiba jur lada jia ba ka Rajya Sabha ka mynjur ban pdiang ïa kane ka Bill.
Ka jingmynjur jong ka Rajya Sabha ïa ka CAB, ka lah ban ïohi ruh ïa ka jingïakhlad lok noh ka National Peoples Party (NPP) bad ka BJP. Ka Seng Asom Gana Parishad ka la dep ïakhlad bad ka BJP naduh ka sngi ba ka Lok Sabha ka mynjur ïa kane ka Bill. Kiwei kiwei pat ki Party ruh na kane ka thaiñ kiba don ka jingïadei kaba jan bad ka BJP ki la byrngem ban kiar noh na kane ka Seng.
Kawei na ki jylla kaba lah ban mih ki jingïakhih kiba jur eh, kadei ka Assam, namar naduh kine ki sngi, kata naduh ba la wanrah ïa kane ka Bill ha Lok Sabha, ka Assam ka la bthei da ki jingïakhih ha kylleng ki jaka bad ym dei tang ka NESO ne ka AASU kaba la lam khmat ïa ka jingïakhih, hynrei kiwei kiwei pat ki Kynhun.
Kawei pat ka jylla kaban jur ka jingïakhih kadei ka Mizoram, kaba ka jingïakhih pyrshah ïa ka CAB la pynlong syndon da ka jylla baroh kawei, ha kaba wat ïa ka Republic Day ruh la boycott kum ka dak ka jingpyrshah ïa kane ka Bill.
Ha Meghalaya ruh baroh kawei ka jylla ka la ïeng tylli pyrshah ïa ka CAB, naduh na ka sorkar ba la ïalam da ka NPP, ha kaba ka BJP ruh ka don lang bad baroh ki Seng Saiñpyrthei kiba don lang ha ka sorkar MDA. Nalorkata ka Congress lei lei ka la mih surok la bunsien ban pyrshah ïa kane ka Bill. Ki Sengbhalang baroh ki la pynlong ki jingïakhih pyrshah ïa kane ka Bill.