Press "Enter" to skip to content

Phet seng noh u President ka Umroi Circle na ka kam ai ticket MDC

Nongpoh, Rymphang 11: Na ka daw ka jingkynnoh ba ka Party UDP Central Body ka la leh donbor ha kaba ia dei bad ka jingai ticket MDC khlem da sngap ia ka sur jong ki nongialam ka Constituency, u President ka UDP Umroi Circle ryngkat bad ki nongialam ka Circle ki la iehnoh syndon ïa ka UDP bad ruh ban pynduh pyndam ïa ka UDP ha Umroi Constituency.
Ïa kane ka rai ban pynduh pyndam noh ïa ka Umroi Circle la shim rai ha ka jingialang jong ka Central Executive Committee kaba la long ha ka 11 tarik mynta u bnai ha Khapmara bad u President ka UDP Umroi Circle, u Bah Mangkara Pathaw u la iehnoh kam syndon kum u President bad ryngkat ki Nongïalam ka Circle kiba pyrshah halor ka jingkynnoh ba ka UDP Central Body ka la leh donbor ban ai ticket ïa u Bah F.D Ramsiej khlem ka jingtip lang jong ki nongialam ka Circle.
Haba ïa kren bad u Nongthoh khubor u Mawphor, u Bah Thomas Lyngdoh, Secretary ka UDP Umroi Circle u la ong ba ka jingleh donbor ka UDP Sengkmie ban ai ticket ïa u Bah F.D Ramsiej uba la pyrshah bad pynjah burom ïa ka UDP ha ka election MLA ba la dep ka dei kawei na kadaw kaba u President ryngkat kiwei kiwei ki nongialam ki la shim ka rai ban pynduh pyndam noh ïa ka UDP bad ruh ban phet noh na ka UDP ha kaba ha katei ka CEC ki la shim lang kawei ka rai ban pyniasoh noh sha ka PDF kaba dei kawei na ka seng sain hima sima kaba don ka nongrim na ka bynta ban kyntiew ïa ka jaid bynriew.
U la ong ruh ha katei ka CEC ki nongialam ki la ia tai sani bha halor ki kam pyrshah party u Bah FD Ramsiej ba ka UDP sengkmie ka dang ai ticket ïa u bad kumjuh ruh ba ki nongïalam ki ki pyrshah ruh halor ka jingleh donbor ka UDP Sengkmie kaba la ai ticket khlem da pyntip lang ïa ki nongïalam ka Circle.
Namarkata, u la iathuh ruh lyngba katei ka CEC ba ïa ka jingialang la pyniaid da u Bah Shngainlang Thangkhiew kum u Vice President ki la pyrkhat sani bad dei hadien katei ka jingiakynduh lang ki la rai ban pyrshah ia ki kam leh donbor halor ka jingai ticket ha kaba ki nongïalam da kawei ka sur ki la shim rai ban pynduh pyndam (Dissolve) ia ka UDP bad ki la rai ban pyniasoh sha ka PDF ban kyrshan ïa u Bah Arbinus Lyngdoh kyrtong ka PDF na ka Umroi bad ruh ban pynjop don burom ïa ka PDF, u la bynrap,
Ka UDP Umroi Circle ka la pynlong ia ka central executive committee ha ka 11 tarik mynta u bnai ha Khapmara, Bhoirymbong bad ha kane ka CEC la pyniaid ia ka meeting da u Vie President, u Bah Shngainlang Thangkhiew.