Press "Enter" to skip to content

Pyllait manifesto ka UDP, buh thong wanrah aiñ kyntiap seng ha District Council

Shillong, Rymphang 11 : Ka United Democratic Party (UDP) ka la buh thong ban pyrshang pynïoh noh da ka Aiñ ban khanglad ïa ka jingkyntiap seng ne ka Anti-Defection Law ha ki district council lada ka ïoh ban thaw ïa ka bor synshar ha kitei ki council.
Ka jingjied ïa ki MDC ba thymmai jong ka Khasi Hills Autonomous District Council (KHADC) bad ruh ha ka Jaintia Hills Autonomous District Council (JHADC) kan long ha ka 27tarik mynta u bnai katba ka jingñiew ïa ki vote pat kan long ha ka 02tarik u Lber.
Katei ka party kaba pyllait ïa ka manifesto ha kane ka sngi ka la ong ruh ba la donkam kyrkieh ïa ka aiñ ban khanglad ïa ka kyntiap seng palat ki MDC ha ki district council kaba poi haduh u pud ba ka la don ka
jingpynkhyllem kaba man ka por ïa ka Executive Committee da kito ki MDC rhah bor.
“Ka party jongngi kan trei ryngkat bad ka sorkar jylla ban pyntikna ba katei ka aiñ kadei ban don ha ki district council,” ong ka UDP ha ka manifesto.
Nalorkata, ka party ka kdew ruh ba kan buh hakhmat ïa ki thong ba ka jingkhlong ïa ki marpoh khyndew kum u Uranium, dewiong, mawshun bad shyiap dei ban leh katkum ki kyndon jong ka sorkar. La ong ruh ba halor u Uranium, ka Executive Committee kan ym ailad ban tih khlem da don ka jingsngewthuh jingmut namar udei u marpoh khyndew uba kham pher bad ktah ïa ka koit ka khiah jong ki paidbah.
Ka UDP ka ong ruh ba kin pdiang hun lada ka Parliament ka mynjur ban kyntiew ïa ka jingdon ki MDC, da kaba bthah shi bynta na ka lai bynta ïa ki longkmie.
Kiwei pat ki mat ha katei ka thong treikam jong ka party, ka UDP ka pyntikna ruh ba lada ki thaw ïa ka EC kin trei na ka bynta ban ïada ïa ka mei mariang.
La ong ruh ba ïa ka Khasi Social Custom of Lineage Act, 1997 jong ka district council donkam ban da ïatai sani bha da baroh. Ha kawei pat ka liang, ka UDP ka pynpaw ruh ka jingbynñiaw halor ka jingïoh lad ki bar ban leh ïa ka khaïi pateng ha Iewduh.
Ha kajuh ka por, ka ong ruh ba lada ka UDP ka wan ha ka bor synshar kan buh ruh ïa ki kashari shnong ne village court ban pyndep ïa ki mukotduma kiba rit khnang ban pynsuk ïa ki nongshong shnong.