Press "Enter" to skip to content

Pynim ka HSPDP ïa ka jingdawa Khasi – Jaiñtia State ha ka Manifesto MDC

Shillong, Rymphang 11 : Ka thong treikam lane ka manifesto jong ka Ka Hills State People’s Democratic Party (HSPDP) na ka bynta kane ka elekshon MDC kaban long ha ka 27tarik mynta u bnai ka kdew ba ka party ka pynim biang ïa ka jingdawa Khasi – Jaiñtia State bad ruh kumjuh ban pyntreikam ïa ka Inner Line Permit.
Ïa katei ka thong treikam jong ka party la pyllait paidbah ha ka sngi Nyngkong da u President ka Party, Bah KP Pangniang ryngkat lang u General Secretary Bah Renikton Tongkhar MLA bad ruh u Chief Organiser ka party Bah Samlin Malngiang ba dei ruh u Myntri sorkar ka jylla nalor kiwei kiwei ki nongïalam, ha ka jingïalang kaba long ha ophis treikam jong ka party.
Haba kren ha katei ka sngi shwa ban pyllait paidbah, u Bah Pangniang u ong ba ki nongrim treikam jong ka party kin ïai neh beit kijuh naduh ba sdang bad haduh mynta khlem da pynkylla.
Ki katto katne ki mat ba ka party ka buh ha kane ka elekshon MDC ki long, ban dawa ïoh noh la ka jong ka Jylla (Khasi bad Jaintia State) katkum ka Article 371 jong ka Riti Synshar ka Ri bad ruh ban ïai ïaleh ban dawa pynbeit noh ïa u pud u sam jong ka Jylla Meghalaya bad Assam.
Ka la ong ruh ban khanglad ïaka jingwan tuid kyrthlep ki jaidbynriew heh paid na ki jylla ba heh ka Ri India bad ka jingwan rung kyrthlep ki mynder ri. Ka ong ruh ba ka seng kan ïaleh tyngeh ban dawa pyntreikam noh ïa ka Inner Line Permit khnang ban teh lakam ïa ki briew kiba nabar ban rung sha u pud u sam ka jylla. kumjuh ban ieng skhem ban ïada ïa ka synshar khadar tynrai, ka riti dustur bad ka ktien thylliej bad kiwei kiwei.
Na ka bynta ban pynkhlaiñ bad pynkupbor shuh shuh ïa ki bor treikam jong ki District Council na ka liang ka HSPDP ka ong ruh ba ki donkam ban weng lane pynbeit noh ïa ka Para 12 A jong ka Sixth Scheduled. Don don ka Working Plan/Working Scheme kaba biang khnang ban plie lad ïa ka jingot bad shalan ïa ki dieng ki siej katkum ka aiñ, ban pyrshah ïa ka jingdon ki Municipal ha u pud ka council,ban pynkupbor ïa ki Dorbar Hima, Dorbar Shnong bad ki Dorbar Kur, ban pyntreikam pura ïa ka Town Committee Act, 1960 jong ka District Council.
La ong ruh ba kum ka party kan dawa na ka sorkar ban pyntreikam noh ïa ka Direct Funding lyngba ki Dorbar Shnong ki Dorbar Hima. Ban ïaleh ban pynïoh bad pynrung ïa ka Ktien Khasi ha ka Khyrnit kaba Phra jong ka Riti Synshar ka Ri, ban ïai ieng pyrshah ïa ka jingthmu tih Uranium ka sorkar pdeng na kane ka jylla, ban don noh ka Mining Plan lane ka Mining Policy katkum ka juk mynta khnang ban lah bteng ïaka jingtih marpoh khyndew.
Ka la pynpaw ruh ïa ka jingdonkam ban don noh ka Agriculture Policy khnang ba ynlah ban nang kyntiew ïa ki nongrep hapoh ka Bri u Hynñiewtrep.
La pynshongkun ïa katei ka jingpyllait paidbah ïa ka thong treikam jong ka party da baroh ki kyrtong kiba pynkhreh ban aireng ïa ka elekshon MDC mynta ka samoi.