Press "Enter" to skip to content

SDANG KAWEH SHONGSHIT KI LAMA ILEKSHON JONG KI DISTRICT COUNCIL

Da u Bah Philip Marweiñ

Kumba la pynbna ha ka 2 tarik mynta u bnai ka ilekshon na ka bynta ban jied ïa ki MDC sha ka Khasi Hills bad Jaintia Hills Autonomous District Council kan long ha ka 27 tarik mynta u bnai, mynta sah sa tang 20 sngi ei ei. Lada ïanujor ia kane ka ilekshon bad ki ilekshon kiba mynshuwa, kane kaba mynta ka kham pjah ha kane ka kynti. Hynrei, naduh ba la sdang ka jingthep kyrteng jong ki kandidet mynta la lai sngi ei ei bad da ka jingkaweh jong ki lama ilekshon ryngkat ka sur pyrta jong ki nongkyrshan, ka lyer ka la sdang shongshit hi laiñ. Ka tarik kaba khatduh ban thep kyrteng ban ïakhun ka dei ha ka 8 tarik bad katba ka tarik bakhatduh ban weng noh na ka jingïakhun kan long haka 9 tarik mynta hi u bnai. Kat haduh ba thoh ïa kane ka jingthoh ym pat ioh jingkheiñ lut katno ngut ki kyrtong MDC ki ban ïakhun ha kan ka kynti na ka bynta baroh ar tylli ki District Council.
Ka bai thep kyrteng ban ïakhun ilekshon mynta ka la poi T.3000/-na ka bynta uwei u nongïakhun bad na ka bynta uwei pa uwei u Kandidet la shah ba un pynlut tang T.5,00,000/- shapoh bad lada don uno uno u ba pynlut palat ban ïa kane un shah ha ka jingpynshitom jong ka ain ilekshon kaba kynthup ïa ka jingbymshah shuh ban ialeh ïa ka ilekshon hadien habud ruh.Ki nongthepvote na ka bynta ka Khasi Hills District Council ki don 7,95,143 ngut katba jong ka Jaiñtia Hills pat ki don 2,49,334 ngut. Ki jaka thepvote na ka bynta ka Khasi Hills District Council ki don 1433 tylli katba jong ka Jaintia Hills ki don 408 tylli. Ha Khasi Hills District Council ki nongthepvote shynrang ki don 383632 ngut katba ki kynthei ki don 411511 ngut; ha Jaiñtia Hills District Council pat ki nongthepvote shynrang ki don 120675 ngut bad ki kynthei ki don 128659 ngut.
Katkum ki kyndon ba la buh da ka sorkar (model code of conduct) ym shah satia ïa ki kandidet ban wanran ïa ka jingïapher niam, kynhun ne jingiapher ha ka ktien ka thylliej da kaba pynkhluit ne pynïashun ïapen. Ym shah ban kren beiñ kren khoh lane thad burom ïa kiwei ki party ne kiwei ki kandidet, lait noh tang ïa ki policy bad ki prokram ne mat treikam jong ki. ïa ka jingim shimet ne kiba ha iing bad ki lok ki jor jong ki kandidet ym shah ban thad burom ei ei ha ka por ilekshon. Ym dei ban pan vote na ki paidbah ha ka kyrteng ka niam lane ha ka kyrteng jong ka kur ne para jait ne kynhun jaitbynriew. Ym shah ban pynlong politiks lane pynlong jaka kanbas ilekshon ïa ki ïingmane blei. La khang pyrshah ban ai peisa ne pyunbam peisa ha ka por ilekshon ia ki nongthepvote lane ym bit satia ruh ban theptuh ia ka vote jong kiwei. Ym shah ruh ban pynkit da ki kali ïa ki nongthepvote da ka jingthmu ban ïoh ïa ki vote jong ki. La mana ban ym shah ïa ki kandidet lane ki nongkyrshan ban pynthut ïa ka shongsuk shongsaiñ jong kiwei ki kandidet lane ki nong thepvote lane ki nongkyrshan jong kiwei pat ki9 kandidet. Ym shah ban pynlong jingïalang ilekshon hakhmat ki iing jong ki paidbah lane ban pyrta pyrshah hakhmat iing jong ki kandidet lane jong ki nongkyrshan jong ki. Ym shah ban tah poster lane appeal ha ki kynroh iing ne jingkhang iing jong ki briew khlem ka jingbit jong ki. Kumjuh ruh ym shah ban pyndonkam ia ka jaka lane ka ïing jong ki briew na ka bynta ki jingïalang lane ïalap ilekshon khlem ka jingbit jong ki.
Ym bit ïa ki party lane ki kandidet bad ki nongkyrshan jong ki ban pynthut lane pynkulmar ïa ka jingialang ilekshon jong kiwei da kaba pynkulmar da ki briew lane da kaba pynkulmar bad pynwit da kaba kylli jingkylli thad burom lane kiwei kiwei ki jait jingpynkulmar. Ym dei ban ïaid proseshon ilekshon hajan ki jaka long jingïalang jong kiwei ki party lane kandidet. ïa ki poster bad ïa ki apil ba la tah da kiwei ki party lane ki nongkyrshan ym dei ban tar lane weng noh da kiwei pat. Lada lap dei ban mudui bad phah kem mar mar ïa kita. Ki party lane ki kandidet lane ki nong kanbas ki dei ban da pyntip bha ïa ki bor sorkar lane ki pulit shuwa ban pynlong jingïalang ha kano kano ka jaka khnang ba ioh jingbit thikna bad ban ioh ruh ia ka jingpahara jong ki pulit. Kane ka dei ka rule kaba pyrkhing bha ba ki kandidet lane ki party ne nongkanbas ki hab ban bud bha khamtam ha kito ki jaka ba don ka jingmana ban pynlong jingïalang.
Ha kum kine ki khep ki kandidet lane ki party lane ki nongkanbas ki hab ban da pan jingbit bha kham kloi ban ïoh jingbit. Haba pynlong proseshon ilekshon ruh dei ban da plan bha ha shuwa bad dei ban da ïoh ruh ïa ka jingbit na ki bor sorkar shuwa ban pynlong khnang ban lait na ki kynrum kynram bad ki jingpynwit kiwei ki ar. Haba ïaid proseshon ruh dei ban ïaid da ka jingdonburom bad ban kiar na ki jingpynkulmar ia kiwei kiwei ki party lane kynhun ïalap ilekshon. Ha ka sngi thepvote ruh baroh ki party bad ki kandidet ki dei ban iatreilang bad ki bor pyniaid ia ka ilekshon ban ïaid beit ïaid ryntih bad la mana ïa ki kandidet bad ki party ba kin pyndonkam da ki buit poh lane thaw jingkulmar lane pynwit ïa kiwei ne ia ki briew jong ka ilekshon. La mana ban kiar na kiwei kiwei ki rukom kiba pynkulmar ne byrngem byrsit lane ïashoh iadat ha ka sngi thepvote lym kumta ka aiñ kan trei la ka jong ka kam. La mana ban ym don ki buit poh kum ka jingkynshoit briew ban thepvote tuh, lane thong da ka peisa ïa ki nong thepvote lane ïa ki polling agent lane ïa ki polling bad presiding ophisar.La khmih lynti ïa baroh ki party, ki kandidet, ki kanbasar bad nongkyrshan ba kin long kiba ryntih bad kohnguh ia ka jingpynïaid jong ki briew ka ilekshon. Na ka bynta ka party kaba don ha ka bor synshar kam dei ban shim kabu lane leh khla bad leh donbor ei ei ruh ha ka por ilekshon. Lada lap ba ka party kaba don ha ka bor, lane lada don ki Minister lane ki briew jong ka party kiba leh tam ia ka aiñ kito kiba lap ki dei ban report mar mar sha ki bor pynïaid jong ka ilekshon ban leh ïa kaba donkam.