Press "Enter" to skip to content

Shimti u bah P.S Dkhar kum u CEO,u Labasa u mascot ka NG 2022

Shillong, Rymphang 11: Ka Executive Committee naka bynta ka National Games 2022, kaba la buh ban long ha ka jylla, ka la shong ïa ka jingïalang kaba nyngkong ka jong ka, hynne, ka sngi, ka lah sngi U Blei.
Ïa kane ka jingïalang la pynïaid ïa ka da u Myntri ba dei khmih ïa ka tnat Sports & Youth Affairs ka sorkar jylla u bah Banteidor Lyngdoh.
Ki rai ba la shim na kane ka jingïalang ba la long hynne ka lah sngi U Blei ka long ba la rai naka bynta ban thung ïa u Commissioner & Se-cretary Sports & Youth Affairs ba mynta u bah P.S Dkhar (IAS) kum u CEO jong ka ophis Games Secreteriat
Katba u mascot naka bynta kane ka lympung ïalehkai un dei u Labasa (Clouded Leopard), katba ïa ka shap ne ka muhor (logo) bad ka phang pdeng (theme) naka bynta kane ka lympung ïalehkai, la bynshet ha ka tnat jong ka IPR bad Education ba kin pynlong da ka jingïakob.
Ka jingïalang ka la shim ruh ïa ka rai ba kan pynkhreh ïa ki jingïalehkai kiba la thmu ban pynlong ha kane ka lympung, ryngkat ka jing-bhah ïa ki jaka ban pynlong ïa ki, haba ïadei bad kane, la thaw ïa kawei ka sub com-mittee ban ïalam da u CEO, ba kin pynkhreh janai bad ruh ban aiti sha ka National Games Organising Com-mittee.
Haba ïashim bynta lang ha kane ka jingïalang, u Working President ka Me-ghalaya State Olympic Association, u bah John F. Kharshiing, u la ai jingmut ba ki nongïashim bynta ha ka national games dei ban ïarap lang ïa ka da ka tnat pulit jong ka jylla, ha ka juh ka por ba la ïakren sani bha ba ka tnat pulit jong ka jylla ba kan pynkhreh ïa ki lad ai jingïarap ïa ki samla ïalehkai, da kaba yn pynkhreh noh shi syndon da ka kynja mat treikam (policy) kaba janai.
Naka liang Banteidor, u la pynpaw ha kane ka jing-ïalang, ba ïa ka stadium bah (main stadium), kumba ka long ba yn tei ïa ka da ka pisa kaba la bhah ïa ka da ka tnat jong ka Social Justice ka sorkar kmie bad ïa kane ka stadium, la rai ban tei ïa ka ha ka jaka kaba don kumba 50 akar ha Mawdiangdiang.
Nalor kata la rai ruh naka bynta ban ïakren bad ka tnat jong ka MUDA ïa ka jaka kaba 64.34 akar ban pynkhreh naka bynta ban tei ïa ka jaka ban shong ban sah jong ki nongïalehkai (games village), nalor kata sa kumba 114.34 akar yn mang kyrpang ban pyn-donkam ïa kiwei pat ki jingdonkam ka national games.
Ïa ka master plan, la bynshet ha ka tnat Directorate of Sports & Youth Affairs bad ban sa aiti sha u Chairmkan ka National Games Organising Committee, ba dei artad u Myntri Rangbah ka jylla ha lane shwa ka taiew ba nyng-kong u bnai Jymmang mynta ka snem.
Ki dkhot ba la poi sha kane ka jingïalang ki long Chief Secretary, Y.Tsering, IAS, Additional Chief Secretary, P.W.Ingty, IAS, Principal Secretary Sports & Youth Affairs, u bah D.P. Wahlang, IAS, Director General of Police, R. Chan-dranathan, IPS, Additional Director General of Police, u bah H.Nongpluh, IPS,CEO Games Secretariat, bah P.S. Dkhar, IAS, kong M.N. Nampui, IAS, Commissioner & Secretary, bah W. Khyllep IAS, Secretary PWD roads bad building, u Working President ka MSOA, General Secretary MSOA, u bah Timothy Dkhar, Deputy Director General, NIC, kong W.A.M. Booth Director Sports & Youth Affairs ryngkat u bah J. Lakiang Chief Engineer, State Sports Council.