Press "Enter" to skip to content

Thang ki sengbhalang West Khasi Hills ïa ka tyngshop u NarendraModi

‘Em ïa ka CAB, Hooid ïa ka ILP’, pyrta ki paidbah
Nongstoiñ, Rymphang 11: Ki Seng na West Khasi Hills kiba kynthup ïa ka HYC WKHD, HANM WKHD, WKSU, WYF kiba dei ki Sengbhalang kiba hap hapoh ka shatri jong ka CoHSo, hynne ka sngi ki la pynlong ïa ka jingïaid paidbah na Lad Rambrai haduh ban da poi ha jingkieng Nonbah jong ka Iew New Nongstoiñ. Ka jingïaid paidbah bad ka jingpyrta jam jong ki nongïalam sengbhalang hynne ka sngi ha Nongstoiñ ka long, ‘No CAB Yes ILP’.
Hangne ki la pynlong ruh ïa ka jingïalang bad la pynïaid ïa ka jingïalang paidbah da u President ka WYF u Samla Mawkordor Kharsyiemlieh. Ka jingïalang ka la pynshai paidbah halor kane ka jingïaid paidbah jong ki bad kata ka long ban pyrshah ïa ka CAB ba la thmu ban pyntreikam da ka sorkar NDA.
Ki Nongkren ki la ther tyngeh ïa ka sorkar NDA hapoh ka jingïalam jong u Narendra Modi kum u Prime Minister, u ba thmu ban pyntreikam ïa ka CAB ha ka thaiñ shatei lam mih ngi baroh kawei.
U President ka WKSU u Samla D. Sun u la kynthoh da kaba tyngeh ïa ka Sorkar NDA ba ïalam da u Narendra Modi halor ka jingthmu ban pynlong aiñ jubor ïa kane ka Bill. U la ong ba lada pyntreikam ïa kane ka Bill, ka jingma ka ap ïa ki jaidbynriew rit paid jong ka thaiñ shatei lam mih ngi baroh kawei. Namar ki bar ri kin wan rung kyrthep katba mon bad long nongshong shnong pura ha ki shnong ki thaw bad ka jaidbynriew Khasi ruh ym slem ba kan shah tyllep ha ki mynder ri.
Na ka liang u Secretary ka WYF Donald Marweiñ u la ong ba ka jingpynlong ïa kane ka jingïaid paidbah, ka dei halor ka jingpyrshah thmu ka Sorkar NDA ban pynlong aiñ ïa ka Citizenship Amendment Bill 2016 lashai ka sngi ha Rajya Sabha. Na ka liang jong u, u la khot la wer sha ki paidbah nongshong shnong ba kin long kiba pynkhreh ban ïakhun pyrshah ïa ka sorkar lada ka long kumno kumno ruh, ban ïada ïa la ka ri bad ka jaidbynriew na ki mynder.
U President ka HANM WKHD u Samla Hamar u la ong ba ïa kane ka Bill la ïai pyrshah naduh ba sdang ka jong ka jingthmu jong ka Sorkar NDA. Hynrei kaba donkam ka long mynta ka Sorkar MDA kaba ïalam da u Conrad Sangma ba kan pyntreikam noh ïa ka ILP khnang ban lah ban ïada na ka jingrung kyrthep kiba nabar.
Katba u Samla Lumlang Kharsyiemlieh President HYC WKHD, u la ong ba lada kane ka Bill kan long aiñ da kaba pass lashai ha Rajya Sabha, ki paidbah kin long kiba la khreh ban sei noh ïa ki khnam ki ryntieh bad la hap ban ïaleh kum ha ka por u Tirot Sing Syiem. “Ngi la ïaleh ïa u dohlieh, mynta ngin ïa leh sa ïa khariong” u la ong.
Hadien ka jingai jingkren pynshai, na ka liang ki nongïalam jong kitei ki seng ki la shimbynta lang ban thang ïa u tyngshop ba la shu shna malu mala da u skum kba ha ka dur jong u Prime Minister ka ri India u Narendra Modi. Kane ka jingleh jong ki, ka long kum ka dak ban pyrshah ïa kane ka Bill.