Press "Enter" to skip to content

Bthah ka MHRC ïa u DGP ban tohkit halor ki kam thombor jong ki Heh Pulit

Shillong, Rymphang 13: Ka Meghalaya Human Rights Commission (MHRC) kala bthah ïa u Director General of Police (DGP) ba un thung ïa ka jingtohkit pyrshah ïa ki artylli ki kam thombor jong ki Heh Pulit kaba pynkheiñ ïa ka hok longbriew manbriew haba aipor ruh 30 sngi ban aiti noh ïa ka kaiphod.
Kine ki kam thombor ïa ka hok longbriew manbriew da ki Heh Pulit ka kynthup ïa ka jingkynnoh shoh tohmet u Deputy Super intendent of Police ka East Khasi Hills Bah Bashan J Laloo ïa u Nongtem Piano ka Balang All Saints Bah Manovan Massar.
Kawei pat ka dei ka jingkynnoh shah shoh u Nongtrei ka Tnad Excise u Mancheng D Marak ha u Heh Pulit Babul Roy lem bad san ngut kiwei pat ki Pulit, kaba jia ha West Garo Hills District.
Kat kum ka hukum jong ka MHRC bala pynmih da u dkhot u Bah PJP Hanaman, la bthah ba ka jingtohkit ka dei ban khlieh da u Heh Pulit uba bat ïa ka kyrdan ym hapoh ka kyrdan Deputy Inspector General of Police (DIGP) haba aipor ruh 30 sngi ban aiti ïa ka kaiphod jingtohkit sha ka Commission.
Kat kum ka hukum, u Bah Manavan Massar ula kynnoh ba ula shah shoh tohmet ha u Deputy Superintendent of Police Bashan J Laloo myn ha ka 19 tarik Nohprah 2018 namar ka jingpynkheiñ ïa ki aiñ niah kali ha ki thaiñ Laitumkhrah. Ha kane ka jingjia u Bah Manovan Massar ula kdïah ka shymprïah kti.
Ula kynnoh ba une u Heh Pulit ula iuhroit ïa ka hok longbriew jong u da kaba shoh tohmet ryngkat ka jingkynnoh nongdih kyiad,nongdih droks nalor ka jingbyrngem “Lada kane ka dei ka Ri-lum Garo, ngan jin da shu siat beit beit ïa u”.
Lah ban kdew hangne ba ka Balang Chuch of North India, Shillong Pastorate Committee bad ka All Saints’ Cathedral kala dawa ïa ki bor ka Aiñ ba kin ai ka jingpynshitom ïa une u Heh Pulit MPS namar ka jingshoh tohmet ïa u riewngeit ka Balang, uba dei u nongtem Organ jong ka Balang.
Kumjuh ruh u Mancheng D Marak uba dei u Nongtrei ka Tnad Excise ula kynnoh ba u shah shoh tohmet ha ki Pulit myn ha ka 7 tarik Nohprah, 2018 katba u dang shong marwei bad kren phone ha ka kali Auto Ricksaw ba pynieng hapoh ka phyllaw Ïing jong u ha Tura.
Kat kum ka jingong u Mancheng, ki Pulit ba kynthup ïa u Babul Roy bad san ngut kiwei pat, kila kynnoh ïa u ba u dei u nong die kyiad be-aiñ bad kila pynbor ïa u ban soi ïa ka thup kurup tiar (seizure list) hapoh ka Police Station. Nalor kane, ula kynnoh ruh ba ula shah pynduh ïa ka jingphah sumar ha Tura Civil Hospital bad ba ym shym la leh eiei pyrshah ïa kine ki Pulit wat hadien ba ula dep mudui da ka ejahar hapoh Tura Police Station. Ka Meghalaya Human Rights Commission (MHRC) kala buh ban shong bishar ïa kine ki artylli ki case ha ka 18 tarik Lber 2019.