Press "Enter" to skip to content

Hadien ka jingkut noh ka CAB, yn mih sa ka jingïakwah burom ha Meghalaya

Shillong: Ka Citizenship Amendment Bill, 2019, ka lah ban kut noh ha Rajya Sabha, hynrei ha Meghalaya kan nym pat kut. Ka daw ka long ba kan sa sdang sa ka thma ïaknieh burom ne kam nongkynti ïa ka jinglah ban pynsangeh ïa kane ka Amendment Bill.
Kane kadei ka snem elekshon ha ka jylla, kawei ka elekshon MDC bad kawei pat kadei ka elekshon MP. Ki paidbah kiba bun ki la ïakren lypa ba khlem kan don beit ka jingïakam trai ba ‘dei ma ngi kiba la ïakhun tyngeh ne dei ma ngi kiba la khih pyrshah ba kane ka Bill kam shym la ïoh ban rah ha Rajya Sabha’.
Kiba bun ki la pynpaw ba kiban shim kabu ne kwah burom nyngkong eh kin dei ki Seng Saiñpyrthei lyngba ki rynsan ïalap elekshon bapher bapher, khamtam ha kane ka taïew ïalap elekshon MDC.
Ki riewpawkhmat kiba la ïoh ban ïakren, ki la ong ba kane ka jingbym pat ïoh lad ka CAB ban treikam, kam dei ka jingjop jongno jongno ruh, hynrei kadei ka jingjop jong u paidbah ka Meghalaya bad kumjuh ruh u paid ka thaiñ shatei lammihngi baroh kawei. “Ki Seng Saiñpyrthei ne ki Sengbhalang kim lah bankam trai halor kane ka jingjop, hynrei ka burom kadei ban leit sha u paidbah baroh uba la ïeng tylli halor kane ka mat”, la ong ki riew pawkhmat.
Ha ka sien kaba nyngkong eh hadien bun bun snem ba la ïohi ïa ki Seng Saiñpyrthei bapher bapher, ki Sengbhalang bapher bapher ryngkat ka jingkyrshan u paidbah ki la ïeng tylli ban pyrshah ïa kane ka Bill naduh ba ka Lok Sabha, ka la mynjur ïa kane ka Bill ha ka 8 tarik u bnai baladep.
Lah ban kdew hangne ba ïa kane ka Bill la wanrah ban ailad ïa ki nong Bangladesh, ki nong Pakistan bad Afghanistan ki bym dei na ka niam Muslim kiba wan sha India hadien ka 31 tarik u Nohprah 2014, ki lah ban long ki nong India lada ki wan phet halor ka jingshah pynshitom beiñ ha kitei ki lai tylli ki ri.