Press "Enter" to skip to content

ïoh nam Women Champion ki longkmie na Mawthadraishan

Mawthadraishan: Ka Mawthadraishan C&RD Block, ka la paw ha ka map jong ka ri India, ha kaba ïadei bad ka Swachh Bharat Mission, na ki ar ngut ki longkmie kiba la kloi ban ïeng ha la ki jong ki kjat ban shna hi ïa ki paiñkhana khlem da ap ban da ïoh pisa na ka sorkar.
I Kong Marshal Basaïawmoit bad i Kong Marchynna Masaïawmoit na ka Shnong Mawkhan, Mawthad-raishan C&RD Block, ki la ïoh pdiang ïa ka Swachh Shakti Award(Women Champion) na u Myntri Rangbah duh Narendra Modi ha ka 12 tarik mynta u bnai, namar ba ki la pyni ïa ka mynsiem trei shitom ha kaba wanrah ïa ka jingkhuid jingpliah ha shnong ha thaw.
Kine ki arngut ki longkmie, ha ka por ba ka sorkar ka dang ïaleh ïa ka Open Defication Free(ODF) lane ki shnong bym don shuh kiba leit paiñkhana pathar lane ki shnong kiba la don paiñkhana lut man la ki thliew ïing, ki la shna hi ïa ka paiñkhana khlem da ap ban da ïoh skhim na ka sorkar, wat lada ha ka por ba ki sdang ka skhim na ka sorkar ka la sdang treikam.
Kane kadei ha ka snem 2014-’15. Katum ka jingïathuh ki ophisar ka Swachh Bharat Mission, Mawthadraishan Block, kine ki longkmie haba ki la ka jingma kaba ap na kaba leit paiñkhana pathar, ki la sdang ban trei ïa kane ka kam, da kaba tih thliew hi khlem da ap ïano ïano haduh ban da dep ka kam.
Lyngba kane, na ka liang ki ophisar ki la phah ïa ka Video Clip jong kane ka khana kine ki longkmie bad ka sorkar India ka la jied ïa ki ban ïoh pdiang ïa kane ka khusnam ryngkat bad ki shiphew ngut kiwei pat ki kynthei na kiwei pat ki jaka ka ri India.
ïa ka khunsnam la sam ha Haryana, ha kaba tang i Kong Marshal i la ïoh lad ban leit ban leit shim ïa kane ka khusnam.
Na ka liang ki ophisar ka Mawthadsraishan Block, ki la pynpaw ka jingsngewkmen halor kane ka jing jop kine ki longkmie bad ong ruh ba kadei ban long ka nuksa kaba bha ïa kiwei pat ki shnong ha ka liang ka jingleh khuid, khamtam ha ka jingpyn biang ïa ki jaka leit bar.